თიანეთის მე-19 საარჩევნო ოლქში თვითმმართველი თემის მერის არჩევნების შედეგები ჯერ კიდევ გაურკვეველია.

ცესკო-ს საიტზე გამოქვეყნებული მონაცემების მიხედვით, რომელიც 20-ვე უბნის შედეგებს ასახავს, 50.01 პროცენტით არჩევნებში თამაზ მეჭიაურმა გაიმარჯვა, მეორე კანდიდატმა, ლელა ქიტესაშვილმა კი 49.99 % მიიღო. განსხვავება კანდიდატების მიერ მიღებულ შედეგებს შორის მხოლოდ ერთი ხმაა.

თუმცა, როგორც თამაზ მეჭიაურის შტაბში ამბობენ, მონაცემები შესაძლოა, ქართული ოცნების კანდიდატის, ლელა ქიტესაშვილის სასარგებლოდ შეიცვალოს. საუბარია 4-5 ბიულეტენის საკითხზე.

თიანეთის მე-19 საარჩევნო ოლქში სხდომა იმართება, შენობის წინ კი თამაზ მეჭიაურის მხარდამჭერები არიან მობილიზებულნი.