იტალიიის რეგიონებში, ვენეტოსა და ლომბარდიაში ავტონომიის გაფართოების საკითხზე რეფერენდუმი იმართება.
როგორც იტალიური მედია წერს, საყოველთაო გამოკითხვაში მონაწილეობის მიღება იტალიის ამ რეგიონებში მცხოვრებ 12 მილიონ ადამიანს შეუძლია. რეფერენდუმის ინიციატორები იტალიის ჩრდილოეთ ნაწილში მდებარე რეგიონების მთავრობის უფლებამოსილების გაფართოებას ემხრობიან, კერძოდ, გამოკითხვის ორგანიზატორები თვლიან, რომ ადგილობრივ მთავრობას შემოსავლების განაწილების კუთხით მეტი ავტონომია უნდა ჰქონდეს.
რეფერენდუმი საკონულტაციო ხასიათისაა და მას კონკრეტული შედეგი ვერ მოჰყვება, რადგან იტალიის კონსტიტუციის მიეხედვით, ცალკეული რეგიონებისთვის ავტონომიის გაფართოება მხოლოდ ცენტრალურ მთავრობასთან მოლაპარაკებების შემდეგ არის შესაძლებელი.
თუმცა, თუ ვენეტოსა და ლომბარდიის რეგიონის მცხოვრებლებმა ავტონომიის გაფართოება მხარი დაუჭირეს, ადგილობრივ მთავრობას ექნება ხალხის მანდატი, რათა რომთან ამ საკითხზე დიალოგი წამოიწყოს.
იტალიის მთავრობა რეგიონებში მიმდინარე პროცესს „უშედეგო პოლიტიკურ ნაბიჯად“ აფასებს. რომში ამბობენ, რომ ავტონომიის გაფართოების საკითხზე დიალოგის დაწყება რეფერენდუმის ჩატარების გარეშეც შეიძლებოდა.
თუმცა, ვენეტოსა და ლომბარდიის მთავრობა, რომელთა სათავეშიც ოპოზიციური პარტია „ჩრდილოეთის ლიგის“ წევრები დგანან, მაინც გადაწყვიტეს გამოკითხვის ჩატარება.
რეფერენდუმის პირველი შედეგები გვიან ღამით გახდება ცნობილი, როდესაც ლომბარდიასა და ვენეტოში უბნები დაიხურება.