შეერთებული შტატების სახელმწიფო მდივანი, რექს ტილერსონი ირანს მოუწოდებს, ერაყის ტერიტორიიდან სამხედრო ექსპერტები და მებრძოლები გაიყვანოს. ეს განცხადება რექს ტილერსონმა საუდის არაბეთში ვიზიტისას გააკეთა.
მისი თქმით, „ისლამური სახელმწიფოს“ წინააღმდეგ ბრძოლა თითქმის დასრულებულია და დროა, ირანული სამხედრო ძალები სახლში დაბრუნდნენ და ტერიტორიებზე კონტროლი ერაყელებს გადააბარონ.
შეერთებულ შტატებში შიშობენ, რომ ირანი რეგიონში მზარდი გავლენის გაფართოებას განაგრძობს. ისლამური სახელმწიფოს მიერ 2014 წელს ერაყის ტერიტორიის მესამედის დაპყრობიდან მოყოლებული, ირანი აქტიურად იყო ჩართული ერაყული შენაერთების ფინანსირებასა და მომზადებაში. ირანი ასევე მონაწილეობას იღებდა სირიის ომში, სადაც პრეზიდენტ ბაშარ ასადს მხარდაჭერას უცხადებდა და ამ ქვეყანაშიც საკუთარი პოზიციები განიმტკიცა.
წყარო: Reuters