„ჩიხურას“ ფეხბურთელის, შოთა კაშიას ოპერაცია წარმატებით დასრულდა. ფეხბურთელი ხაშურის გზაზე, ავტოსაგზაო შემთხვევის შედეგად დაშავდა და ლავიწის ძვალი მოიტეხა. კაშია მოედანს დაახლოებით სამ-ოთხ თვეში დაუბრუნდება.

პირველ არხს ავტოავარიაში დაზარალებულ ფეხბურთელზე ბოლო სიახლეები “ჩიხურას” პრეს-ატაშემ, თორნიკე შალამბერიძემ შეატყობინა.

„შოთას ოპერაცია საათნახევარი გრძელდებოდა. ოპერაცია წარმატებით დასრულდა და კაშია ახლა უკვე პალატაში გადაიყვანეს. სავარაუდოდ, კლინიკას ხვალ, 24 ოქტომბერს დატოვებს. ერთი თვე ხელი არ უნდა ამოძრავოს და მერე ვარჯიშს მსუბუქად განაახლებს. მოედანს კი, მაქსიმუმ 3-4 თვეში დაუბრუნდება და დიდი დატვირთვით ვარჯიშსაც უპრობლემოდ შეძლებს“, – განაცხადა შალამბერიძემ.

შეგახსენებთ, რომ საქართველოს მოქმედი ვიცე-ჩემპიონის 9 ფეხბურთელი ბათუმის "დინამოსთან" გამართული ეროვნული ლიგის 31-ე ტურის მატჩის შემდეგ თბილისში მიემგზავრებოდა. "ჩიხურას" მიკროავტობუსი ღამის 02:00 საათზე, ხაშურის რაიონის სოფელ გომთან ავარიაში მოყვა. საჩხერელთა კაპიტანს, შოთა კაშიას ლავიწის ძვალი დაუზიანდა. შემთხვევის შედეგად, მის გარდა, სხვა არავინ დაშავებულა.