„ნაციონალური მოძრაობა“ ადგილობრივი თვითმმართველობის არჩევნების მეორე ტურში მონაწილეობას არ მიიღებს. ამის შესახებ პარტიის პოლიტსაბჭოს დასრულების შემდეგ ჟურნალისტებს „ნაციონალური მოძრაობის“ ქუთაისის მერობის კანდიდატმა გრიგოლ ვაშაძემ განუცხადა.
„ნაციონალური მოძრაობა“ მერობის არჩევნების მეორე ტურში მარტვილსა და ქუთაისში გავიდა.
„ეს იყო თითქმის ერთსულოვანი გადაწყვეტილება. გარდა ამისა, შეიძლება ითქვას, რომ „ნაციონალურმა მოძრაობამ“ მიატოვა ბრძოლის სტანდარტული მეთოდები. ჩვენ გადავდივართ ბრძოლის ახალ ეტაპზე და ეს ითვალისწინებს კონსტიტუციით გათვალისწინებულ ბრძოლის ყველა მეთოდს“, - განაცხადა გრიგოლ ვაშაძემ.
მისივე თქმით, "მასობრივი გაყალბების, შანტაჟის, ადმინისტრაციული რესურსის გამოყენების ფონზე, მიღებულია გადაწყვეტილება, რომ არჩევნების მეორე ტურში არ მივიღოთ მონაწილეობა. თუ ცირკის დირექტორმა ვინმეს კლოუნად დანიშვნა გადაწყვიტა, ამ კლოუნადას ჩატარება "ქართულ ოცნებას" მარტო მოუწევს".
“ეს იყო თიქთმის ერთსულოვანი გადაწყვეტილება. აზრთა სხვადასხვაობა ყოველთვის არის ყველა საკითხზე, მაგრამ მას შემდეგ, რაც პოლიტსაბჭომ ეს გადაწყვეტილება მიიღო, ყველას ერთი აზრი აქვს”,-განაცხადა ვაშაძემ.
პოლიტსაბჭო პარტიის ცენტრალურ ოფიში სამ საათზე დაიწყო და რამდენიმე საათის განმავლობაში გრძელდებოდა.