პარტია „ერთიანი საქართველოსთვის“ თიანეთის მერობის კანდიდატის თამაზ მეჭიაურის ინფორმაციით, არასამთავრობო ორგანიზაცია „ყოფილი პოლიტპატიმრები ადამიანის უფლებებისათვის" წარმომადგენლებს თავს დაესხნენ და მანქანა დაუწვეს.
როგორც მეჭიაურმა პირველ არხთან საუბრისას განაცხადა, მისი პარტიის შტაბიდან გასულ მახარე სისაურსა და რამაზ ღვალაძეს უცნობმა პირებმა ჟინვალის ტერიტორიაზე მანქანის გაჩერება მოსთხოვეს.
მეჭიაურის ინფორმაციით, არასამთავრობო ორგანიზაციის ერთ-ერთი წევრი, რომელსაც დღეს თავს დაესხნენ, სწორედ იმ უბანზე ესწრებოდა ხმის დათვლის პროცესს, სადაც მისივე თქმით, ბიულეტენები გაყალბდა.
თიანეთის მერობის კანდიდატის ინფორმაციით, მახარე სისაური და რამაზ ღვალაძე მისი პარტიის წევრები არ არიან. მეჭიაურის თქმით, არასამთავრობო ორგანიზაციის წევრებმა არჩევნებზე დახმარების სურვილი თავად გამოთქვეს.
„ჩვენი შტაბიდან გასულმა არასამთავრობო ორგანიზაცია „ყოფილი პოლიტპატიმრები ადამიანის უფლებებისათვის" წარმომადგენლებმა მახარე სისაურმა და რამაზ ღვალაძემ, რომლებიც ესწრებოდნენ საარჩევნო პროცესებს, გვაცნობეს, რომ მათ ჟინვალის გზაზე თავს დაესხნენ და დაუწვეს მანქანა.
შემთხვევის ადგილზე მოვედი. როგორც სისაური და ღვალაძე ყვებიან, ჩვენი პარტიიდან გასულებს უკან მანქანა მიჰყვებოდათ. როდესაც ჟინვალის ტერიტორიაზე იყვნენ, მოსთხოვეს მანქანის გაჩერება. ავტომობილიდან ერთი პირი გადმოვიდა, მიაყენა მათ სიტყვიერი შეურაცხყოფა, შემდეგ კი ცეცხლმოკიდებული ბოთლი მანქანას ესროლა. თავდამსხმელები ადგილიდან მიიმალნენ“,- განაცხადა მეჭიაურმა.
როგორც პირველ არხს შინაგან საქმეთა სამინისტროში განუცხადეს, ფაქტზე გამოძიება სისხლის სამართლის კოდექსის 187-ე მუხლის მეორე ნაწილით მიმდინარეობს, რაც ნივთის დაზიანებას ან განადგურებას ცეცხლის წაკიდებით, აფეთქებით ან სხვა საყოველთაოდ საშიში საშუალებით გულისხმობს.
უწყების ცნობით, მიმდინარეობს საგამოძიებო მოქმედებები, დანიშნულია შესაბამისი ექსპერტიზები.