ავსტრიის სახალხო პარტიის ლიდერი სებასტიან კურცი კოალიციური მთავრობის ფორმირებას ულტრამემარჯვენე თავისუფალ პარტიასთან გეგმავს.

„დოიჩე ველეს“ ინფორმაციით, სებასტიან კურცმა მოლაპარაკების მაგიდასთან პარტიის ლიდერი ჰაინც-კრისტიან შტრახე უკვე მიიწვია. სავარაუდოდ, შეხვედრა ხვალ, 25 ოქტომბერს გაიმართება.

სებასტიან კურცი აღნიშნავს, რომ მისი კოალიცია აუცილებლად პრო-ევროპული იქნება. ჯერ კიდევ ავსტრიის საგარეო მინისტრის პოსტზე მყოფი სებასტიან კურცის განმარტებით, მათი პარტიების პროგრამაში ცვლილებების გატარების კუთხით საერთო მიმართულებები ისახება. ორივე პარტია წინასაარჩევნო დაპირებებში მოქალაქეებს არალეგალური მიგრაციის განულებას პირდებოდა.

საპარლამენტო არჩევნების შედეგად, სახალხო პარტიამ ამომრჩეველთა ხმების 31.6%, თავისუფალმა პარტიამ კი 26%-ის მიღება შეძლო.

ექსპერტების ცნობით, ელექტორატის თითქმის 60%-ის მემარჯვენე ძალებისკენ გადახრა სწორედ ისლამიზაციის შიშითა და საიმიგრაციო პოლიტიკით არის განპირობებული.