აშშ ლტოლვილების მიღების პროგრამას ანახლებს, თუმცა 11 ქვეყნიდან მიგრანტების შემოწმების კრიტერიუმებს ამკაცრებს. დონალდ ტრამპის შესაბამისი განკარგულება თეთრი სახლის ოფიციალურ ვებგვერდზე უკვე გამოქვეყდა. აღნიშნული პროგრამის მოქმედება დონალდ ტრამპმა ინაუგურაციიდან ერთი კვირის შემდეგ 120 დღით შეაჩერა. ლტოლვილთა მიღების პროგრამის შეზღუდვის ვადა 24 ოქტომბერს ამოიწურა.

როგორც სააგენტო Associated Press-ი წერს, დონალდ ტრამპის ახალ განკარგულებაში არ არის მითითებული, თუ რომელ 11 ქვეყანაზეა საუბარი. დოკუმენტის თანახმად, ახალი წესები 90 დღე იმოქმედებს. ამასთან, აშშ-ის შიდა უსაფრთხოების სამსახურის განცხადებით, გამკაცრებულ კონტროლს გაივლიან იმ ქვეყნების მოქალაქეები, რომლებიც აშშ-ისთვის საფრთხეს წარმოადგენენ.

„აშშ-ის პოლიტიკაა დაიცვას მოსახლეობა ტერორისტული თავდასხმებისგან და სხვა საფრთხეებისგან. ამ პოლიტიკის შესრულებაში მნიშვნელოვან როლს ასრულებს სკრინინგისა და შემოწმების პროცედურები, რომლებიც ხორციელდება იმის განსასაზღვრად, თუ რომელი ქვეყნის მოქალაქეებს შეუძლიათ აშშ-ში შესვლა, მათ შორის ლტოლვილთა მიღების პროგრამით“, - ნათქვამია განკარგულებაში.

აშშ-ში მიგრანტების რაოდენობის შეზღუდვა დონალდ ტრამპის ერთ-ერთი მთავარი წინასაარჩევნო დაპირება იყო. ამერიკული კვლევითი ცენტრის Pew Research-ის მონაცემებით, აშშ-მა 2017 წლის ცხრა თვის განმავლობაში 28 ათასი ლტოლვილი მიიღო. ლტოლვილთა საკითხებზე მომუშავე გაერო-ს უმაღლესი კომისრის სამმართველოს ინფორმაციით, 2016 წელს აშშ-ში თავშესაფარი 97 ათასმა ადამიანმა მიიღო.

ამასთან, დონალდ ტრამპის გასული თვის განკარგულებით, 2018 წელს აშშ 45 ათასს ლტოლვილს მიიღებს, რაც 1980 წლის შემდეგ ყველაზე დაბალი ზღვარია. აღსანიშნავია, რომ ბარაკ ობამას ადმინისტრაციის მიერ დაწესებული ზღვარით, გასულ წელს ქვეყანას 110 ათასი ლტოლვილის მიღება შეეძლო.