რუსეთმა გაერო-ს უშიშროების საბჭოში სირიაში ქიმიური იარაღის გამოყენების საკითხის გამოძიების შესახებ რეზოლუციას ვეტო დაადო. გაერო-სა და ქიმიური იარაღის აკრძალვის საერთაშორისო ორგანიზაციის ერთობლივი მექანიზმი სირიის სამოქალაქო ომის ფონზე, 2015 წელს იქნა შემუშავებული. ზემოთ ხსენებული მექანიზმი მიზნად ისახავს, გამოვლინდეს, თუ ვინ გამოიყენა ქიმიური იარაღი მიმდინარე კონფლიქტში.
გაერო-სა და არასამთავრობო ორგანიზაციების ინფორმაციით, სართო ჯამში სირიაში ქიმიური იარაღი სულ მცირე 30-ჯერ იქნა გამოყენებული.
გაერო ასევე მიზნად ისახავს, ბოლომდე გამოიძიონ 2017 წლის 4 აპრილს ხან შეიხუნში განხორციელებული ქიმიური თავდასხმა მშვიდობიანი მოქალაქეების წინააღმდეგ, რასაც 100-მდე ადამიანის სიცოცხლე ემსხვერპლა. გამოძიების წინასწარი შედეგებით, ქიმიური იარაღის აკრძალვის ორგანიზაციამ ზაფხულში შუალედური დასკვნა გამოაქვეყნა, სადაც ეწერა, რომ ქიმიური თავდასხმის ავტორი ბაშარ ალ ასადის მთავრობაა. სექტემბერში კი გაერო-ს ადამიანის უფლებათა კომიტეტმა იდლიბის პროვინციის ქალაქ ხან შეიხუნში მომხდარი ქიმიური შეტევის გამო პასუხისმგებლობა სირიის მთავრობას დააკისრა.
რუსეთის მიერ რეზოლუციაზე ვეტოს დადებას მწვავე შეფასება მოჰყვა გაეროში. ამერიკის შეერთებული შტატების მუდმივმა წარმომადგენელმა გაეროში ნიკი ჰეილიმ განაცხადა, რომ რუსეთი ამ ქმედებით ტერორისტებსა და დიქტატორებს ხელს უწყობს ჩაიდინონ ომის დანაშაული. მოსკოვმა ამერიკელი დიპლომატი აღნიშნული განცხადების გამო მწვავედ გააკრიტიკა.