გალში ინციდენტების პრევენციისა და მათზე რეაგირების მექანიზმის ფარგლებში სამუშაო ჯგუფების მორიგი შეხვედრა იმართება. სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილემ კახაბერ ქემოკლიძემ ჟურნალისტებთან საუბრისას განაცხადა, რომ დღევანდელ შეხვედრაზე კვლავ იქნება საუბარი გიგა ოთხოზორიას მკვლელობაში ბრალდებულის რაშიდ კანჯი-ოღლის გადმოცემაზე. ასევე, განხილული იქნება ყველა ის ინციდენტი, რომელიც ბოლო პერიოდში მოხდა, მათ შორის ადამიანების დაკავება ე.წ. საზღვრის გადაკვეთის ბრალდებით. ასევე, საუბარი იქნება კობა ოკუჯავას შესახებ, რომელიც 16 ოქტომბერს ე.წ. აფხაზურმა მილიციამ დააკავა.