დილიდან დაძაბული ვითარებაა მთაწმინდის საოლქო საარჩევნო კომისიაში, სადაც ამ წუთებში სხდომის განახლება ამ დრომდე ვერ ხერხდება. ადგილზე საპატრულო პოლიციაა მობილიზებული.
„დემოკრატიული მოძრაობა - თავისუფალი საქართველოს“ ლიდერები მთაწმინდის მე-13 უბნის შედეგების გადათვლას ითხოვენ და დარბაზს არ ტოვებენ. როგორც ისინი აცხადებენ, საარჩევნო ბლოკს ამ უბანზე პროპორციულ არჩევნებში ნული ხმა დაუწერეს, მაშინ, როცა 15 ადამიანი აცხადებს, რომ უბანზე მისვლისას ხმა „დემოკრატიულ მოძრაობა - თავისუფალ საქართველოს“ მისცა. ადგილზე იმყოფებოდა ნინო ბურჯანაძეც.
საოლქო საარჩევნო კომისიამ ბლოკის საჩივრის განხილვაზე უარი განაცხადა, რასაც დაპირისპირება მოჰყვა. საოლქო საარჩევნო კომისიის თავმჯდომარის, გიორგი ზირაქიშვილის განცხადებით, აღნიშნული საჩივარი უბანზე უნდა დაწერილიყო.