გალში ინციდენტების პრევენციისა და მათზე რეაგირების მექანიზმის ფარგლებში სამუშაო ჯგუფების საიუბილეო 50-ე შეხვედრა გაიმართა. ასევე, შეხვედრამდე გაეროს საინფორმაციო სესია გაიმართა, რომელშიც უცხოელი ექსპერტები მონაწილეობდნენ. სესია სხვადასხვა კონფლიქტურ რეგიონში კრიმინალთან ბრძოლის გამოცდილებას ეხებოდა.
შეხვედრის შემდეგ, ენგურის ხიდზე ჟურნალისტებთან კომენტარი გააკეთა სუს-ის ანალიტიკური დეპარტამენტის უფროსის მოადგილემ, კახაბერ ქემოკლიძემ. მისი განცხადებით, დღევანდელ შეხვედრაზე კვლავ იყო განხილული 2016 წლის 16 მაისს ხურჩაში მოკლული გიგა ოთხოზორიას მკვლელის საკითხი. ასევე, როგორც ქემოკლიძემ აღნიშნა, საუბარი იყო საქართველოს იმ მოქალაქეების შესახებ, ვისაც ე.წ. საზღვრის უკანონოდ გადაკვეთა ედებათ ბრალად. კახაბერ ქემოკლიძის თქმით, ბოლო დროს წარმოქმნილი ლაფსუსების გამო, განსაკუთრებული ყურადღება ცხელი ხაზის მუშაობის ეფექტურობას დაეთმო.
ინციდენტების პრევენციისა და მათზე რეაგირების მექანიზმის ფარგლებში სამუშაო ჯგუფების შემდეგი შეხვედრა 28 ნოემბერს გაიმართება.