საქართველოს პრეზიდენტ გიორგი მარგველაშვილს ფერმერთა ასოციაციის პრეზიდენტმა ნინო ზამბახიძემ პრეზიდენტის სასახლეში გამართულ შეხვედრაზე დარგის განვითარებისთვის მნიშვნელოვანი ახალი პროექტების შესახებ ანგარიში წარუდგინა. მოეწყო ოთხი პროექტის პრეზენტაცია.

ასოციაციის ახალ პროექტებს შორისაა ფერმერთა სათათბირო, საქართველოს ფერმერთა სადისტრიბუციო კომპანია, მობილური აპლიკაცია „აგრონავტი“ და წიგნი „გზა ფერმერობისკენ“. მობილური აპლიკაცია აგრონავტი” ფერმერებს მათ მიერ წარმოებული პროდუქტის გასაღების, ახალ ბაზარზე გასვლისა და დაკავშირების საშუალებას აძლევს.

წიგნში „გზა ფერმერობისკენ“ აღწერილია საქართველოში გავრცელებული და პერსპექტიული 60-ზე მეტი სასოფლო სამეურნეო კულტურის წარმოების ტექნოლოგია.

ფერმერთა სათათბირო 2017 წელს შეიქმნა და მიზნად ისახავს რეგიონებში სოფლის მეურნეობის სექტორში არსებული პრობლემების გამოვლენას, ასევე საქართველოს ფერმერთა ასოციაციის საკომუნიკაციო ქსელის მუნიციპალურ დონეზე გავრცელებას. ფერმერთა სათათბიროშო ქვეყნის 60 მუნიციპალიტეტიდან რეგიონული წარმომადგენლობების დონეზე და საქმიანობის სფეროების მიხედვით 120 ფერმერია წარმოდგენილი.

რაც შეეხება საქართველოს ფერმერთა სადისტრიბუციო კომპანიას, ის გასულ წელს შეიქმნა და მომარაგების დახვეწილი, მარტივი და უწყვეტი ჯაჭვის შექმნას ემსახურება. კომპანიის ამოცანაა ადგილობრივი ფერმერული ორგანიზაციების გაძლიერება და იმპორტული პროდუქციის ადგილობრივით ჩანაცვლება.