ევროპარლამენტმა „აზრის თავისუფლებისთვის“ ანდრეი სახაროვის სახელობის ჯილდო ვენესუელელ ოპოზიციონერთა ჯგუფს მიაკუთვნა. ინფორმაციას ამის შესახებ ევროპარლამენტის რამდენიმე წევრი სოციალურ ქსელ „ტვიტერში“ ავრცელებს.
როგორც ევროპარლამენტარები აღნიშნავენ, საპატიო პრემის მფლობელები გახდნენ ვენესუელელი დეპუტატები და საზოგადო მოღვაწეები, რომელთა ნაწილი ამჟამად დაპატიმრებულია და რომლებიც ქვეყანაში დემოკრატიის, ადამიანის უფლებებისა და ეკონომიკის დეგრადაციის წინააღმდეგ იბრძვიან.
სახაროვის პრემიის მფლობელები ვენესუელის დემოკრატიული ერთიანობის ბლოკის წევრები არიან.
რუსი უფლებადამცველის, ანდრეი სახაროვის სახელობის ჯილდო ევროპარლამენტის მიერ 1988 წლიდან გადაეცემა იმ პირებს, რომლებმაც ადამიანის უფლებებისთვის ბრძოლაში განსაკუთრებული წვლილი მიუძღვით. საერთაშორისო პრემიის მფლობელს ფულადი ჯილდოს სახით ასევე 50 ათასი ევრო გადაეცემა.
დაჯილდოების ცერემონიალი ტრადიციულად დეკემბერში სტრასბურგში ევროპარლამენტის პლენარულ სესიაზე გაიმართება.