წალენჯიხის რაიონის სოფელ მუჟავადან გადმოყვანილ შსს-ს განსაკუთრებულ დავალებათა დეპარტამენტის ჯარისკაცს ყბის არეში, ნიკაპთან ერთი ჭრილობა აღენიშნებოდა, - ამის შესახებ ზუგდიდის რეფერალური საავადმყოფოს ექიმმა, მაია ესებუამ განაცხადა.

მისივე თქმით, საავადმყოფოში შეყვანისას მამაკაცი უკვე გარდაცვლილი იყო და მას სასიცოცხლო მაჩვენებლები არ აღენიშნებოდა.

„როდესაც შემოასვენეს, სიცოცხლის ნიშანწყალი არ ეტყობა. აღენიშნებოდა ერთი ჭრილობა ყბის არეში, ნიკაპთან“, - აღნიშნა მაია ესებუამ.

როგორც პირველი არხის ჟურნალისტი ადგილიდან იუწყება, დაღუპული ჯარისკაცი ქუთაისში ექსპერტიზაზე უკვე გადაასვენეს.

შეგახსენებთ, წალენჯიხის რაიონის სოფელ მუჟავაში შსს-ს განსაკუთრებულ დავალებათა დეპარტამენტის ჯარისკაცი დაიღუპა.