„ყველა გასასვლელი ჩაკეტილი იყო, ძალოვნები რეზინის ტყვიებს გვესროდნენ“, - ამის შესახებ გიორგი მამაცაშვილმა განაცხადა, რომელიც 26 მაისის საქმეზე ბრალდების მხარის პირველი მოწმეა.
„ყველა მხრიდან იყო ძალოვანთა კორიდორი, დაახლოებით, 1-ის 10 წუთი იყო, როდესაც ჩიტაძისა და ფურცელაძის ქუჩიდან დავინახეთ სამართალდამცავების კორდონი. მე ფოტოაპარატი მქონდა და ვიღებდი კადრებს, როდესაც შეიარაღებული ძალოვანები მოდიოდნენ. ხალხმა გამოქცევა დაიწყო პიონერთა სასახლისკენ, მივუახლოვდით გრიბოედოვის ასახვევს. იდგნენ პოლიციელები და როდესაც გვინდოდა გასვლა, არ გაგვიშვეს. ვამბობდით, რომ ჟურნალისტები ვართ, მაგრამ არ გაგვიშვეს, არც მეტროში შეგვიშვეს და როდესაც ამოვბრუნდით, მაშინ მძიმე წუთები დაიწყო.
გზები გადაკეტილი იყო. მე და ბექა სივსივაძე მოვრბოდით, რეზინის ტყვიებს გვესროდნენ ძალოვნები. საკმაოდ დიდი ოდენობით ნატყვიარები გვქონდა. როცა ვეღარ გავუძელი, დავეცი და გონება დავკარგე. დაახლოებით ნახევარი საათით ხელფეხშეკრულები ვეყარეთ ე.წ. ხამუთებით.
წვიმდა, ძალოვნები ხელკეტებით მოძრაობდნენ. რამდენჯერმე ვუთხარი, რომ მე და ბექა ვართ ჟურნალისტები, აკრედიტაციებიც მივეცით და უარესად გადაგვიარეს მერე. გვერდზე მეწვა მამაკაცი, რომელიც გასისხლიანებული იყო და ვუთხარი, რომ წყალი მაინც მიეცათ, შენ ვინ გეკითხებაო და შემდგნენ კიდევ და ისევ გონება დავკარგე.
მერე მოვიდა ფოტოგრაფი ირაკლი გედენიძე, რომელმაც უთხრა ძალოვნებს, რომ ჟურნალისტები ვიყავით და გაგვიშვეს. შეიძლება ითქვას, რომ გედენიძემ გადაგვარჩინა“, - განაცხადა გიორგი მამაცაშვილმა.
26 მაისის საქმეზე ბრალდების მხარე დღეს მტკიცებულებების გამოკვლევის ეტაპზე გადადის. პროკურატურა ორ მოწმეს, დაზარალებულის სტატუსის მქონე ჟურნალიტებს, გიორგი მამაცაშვილსა და ბაქარ სივსივაძეს დაკითხავს.
პროკურატურის განმარტებით, მოწმეები დაადასტურებენ იმ გარემოებას, რომ 2011 წლის 26 მაისის დარბევის დღეს სამართალდამცავები მათ ფიზიკურად გაუსწორდნენ და ტერიტორიის თავისუფლად დატოვების უფლება არ მისცეს.
დაცვის მხარე კი აცხადებს, რომ ბრალდებულებს საქმესთან კავშირი არ აქვთ და პროკურატურას ამის დამადასტურებელი მტკიცებულებები არ აქვს.
26 მაისის საქმეზე სახელმწიფო ბრალდება ყოფილ მაღალჩინოსნებს ლევან ქარდავას, დათა ახალაიას, რევაზ შიუკაშვილს, გიორგი ლორთქიფანიძესა და ვასილ ლელუაშვილს უფლებამოსილების გადამეტებას ედავება.