ამერიკის შეერთებული შტატების წარმომადგენლობითმა პალატამ ირანის წინააღმდეგ სანქციების დაწესების კანონპროექტს მხარი დაუჭირა. მხარდამჭერი 423 კონგრესმენი იყო, ორი კი წინააღმდეგი წავიდა.

დოკუმენტი მოუწოდებს ამერიკის შეერთებული შტატების პრეზიდენტს, განსაზღვროს ის კომპანიები, რომლებიც ირანს სარაკეტო პროგრამის განხორციელებაში ეხმარებიან და მათ წინააღმდეგ სანქციები დაწესდეს.

სანქციების სიაში მოხვედრილებს ამერიკის შეერთებულ შტატებში შესვლა აეკრძალებათ, მათი ქონება კი გაიყინება.
როგორც ამერიკული მედია აღნიშნავს, კანონპროექტი ისეა მომზადებული, რომ ის ირანსა და საერთაშორისო ექვსეულს შორის მიღწეული ატომური შეთანხმების შესრულებას ხელს არ უშლის.

იმისთვის, რომ კანონპროექტი ძალაში შევიდეს აუცილებელია, ის სენატმა დაამტკიცოს, შემდეგ კი პრეზიდენტმა მოაწეროს ხელი.