აშშ-ის 35-ე პრეზიდენტის ჯონ ფიცჯერალდ კენედის მკვლელობისთვის გასამართლებული ლი ჰარვი ოსვალდი, თავდასხმამდე 2 თვით ადრე, რუსეთის სახელმწიფო უსაფრთხოების კომიტეტის (კგბ-ის) თანამშრომელსა და საბჭოთა დიპლომატთან კონტაქტზე იმყოფებოდა. ამის შესახებ საუბარია ამერიკის შეერთებული შტატების სამთავრობო არქივის მიერ გასაჯაროებულ გრიფით საიდუმლო დოკუმენტებში.

ჩანაწერებიდან ირკვევა, რომ ლი ჰარვი ოსვალდმა 1963 წლის 28 სექტემბერს, მეხიკოში, საბჭოთა კავშირის საელჩოში, სატელეფონო ზარი განახორციელა, რომელსაც იმ დროს ამერიკული სპეცსამსახური ფარულად უსმენდა. ოსვალდი კონსულ ვალერი კოსტიკოვს ესაუბრა. მოგვიანებით, 1-ელ ოქტომბერს საელჩოში კიდევ ერთი ზარი გაისმა, რა დროსაც თავდამსხმელმა „ვაშინგტონში ტელეგრამასთან“ დაკავშირებით სიახლეების შესახებ იკითხა, რაზეც პასუხად მიიღო, რომ მოთხოვნა გაგზავნილია, თუმცა პასუხი ჯერ არ არის.

ვალერი კოსტიკოვი КГБ-ის აგენტი იყო, რომელიც საბოტაჟებისა და მკვლელობების საკითხებზე იყო პასუხისმგებელი. დოკუმენტებში დაზუსტებული არ არის, მიიჩნევდა თუ არა აშშ-ის დაზვერვის ცენტრალური სააგენტო ( CIA ) ჰარვი ოსვალდს КГБ -ის აგენტად.

ლი ჰარვი ოსვალდი 1959-1962 წლებში მინსკის რადიოქარხანაში მუშაობდა და რუს მარინა პრუსაკოვაზე იყო დაქორწინებული, თუმცა საბჭოთა კავშირის მოქალაქეობის მინიჭებაზე უარის მიღების შემდეგ, იგი ამერიკის შეერთებულ შტატებში დაბრუნდა.

სამთავრობო არქივში დაცულ 2800-მდე დოკუმენტს, რომელიც 1960-1970-იანი წლების მოვლენებს მოიცავს, აშშ-ის ადმინისტრაციამ გრიფი ხუთშაბათს მოხსნა. თუმცა გამოძიების ფედერალური ბიუროსა და დაზვერვის ცენტრალური სააგენტოს რეკომენდაციით, ამ ეტაპზე, არ გასაჯაროვდება კიდევ 300-მდე ჩანაწერი, რომელიც, შესაძლოა, ეროვნული ინტერესებისთვის ზიანის მომტანი აღმოჩნდეს. აღნიშნულ დოკუმენტაციას გრიფის მოხსნამდე, ზემოთ ხსენებული უწყებები 180 დღის ვადაში შეისწავლიან, რის შემდეგაც ისინი საზოგადოებისთვის ხელმისაწვდომი გახდება.

1992 წელს ექსპრეზიდენტმა ჯორჯ ბუშ უფროსმა მასალებს გრიფით „საიდუმლოს“ სტატუსი 25 წლის ვადით გაუხანგრძლივა. ამავე წელს, ერთ არქივში გაერთიანდა როგორც კენედის მკვლელობასთან დაკავშირებული 1960-1970 წლების მასალები, ასევე 1990-იანი წლების დოკუმენტებიც. მათ შორის, დაზვერვისა და სპეცოპერაციების მონაცემები. შესაძლოა, სწორედ ეს დოკუმენტები მოხვდა იმ 300 მასალას შორის, რომელიც ამ ეტაპზე ჯერ კიდევ საიდუმლოდ რჩება.

ჯონ კენედი ტეხასის შტატის ქალაქ დალასში 1963 წლის 22 ნოემბერს მოკლეს. ოფიციალური ვერსიით, მკვლელი ყოფილი საზღვაო ქვეითი ლი ჰარვი ოსვალდი აღმოჩნდა, რომელმაც გამოძიების ვერსიით, პრეზიდენტის კორტეჟს ცეცხლი 3-ჯერ გაუხსნა.

ლი ჰარვი ოსვალდი კენედის გარდაცვალებიდან 1.5 საათში დააკავეს, თუმცა ის 24 ნოემბერს საპატიმროში გადაყვანის დროს, ერთ-ერთი ღამის კლუბის მეპატრონემ, ჯეკ რუბიმ, პრეზიდენტის მოკვლის გამო, თითქოს, შურისძიების მოტივით ჩაცხრილა.