საქართველოს პრეზიდენტმა დღეს კონკურსის „ჟურნალისტები კონსტიტუციაზე" გამარჯვებული ჟურნალისტები დააჯილდოვა, რომლებმაც 2017 წელს საკონსტიტუციო საკითხებზე მასალები მოამზადეს.

საუკეთესო სატელევიზიო ნაშრომის კატეგორიაში პირველ ადგილზე პირველი არხის ჟურნალისტი ეკატერინე კოპალიანი გავიდა, ხოლო მეორე ადგილი „რუსთავი 2“-ის ჟურნალისტმა სოფო ზურაბიანმა დაიკავა.

საუკეთესო რადიოსიუჟეტის კატეგორიაში, პირველი ადგილი „რადიო 1“-ის ჟურნალისტმა ნათია არველაძემ დაიკავა, ხოლო მეორე ადგილზე ასევე „რადიო 1“-ის ჟურნალისტი მანანა დევაძე გავიდა.

საუკეთესო ელექტრონული ნაშრომის კატეგორიაში პირველ ადგილზე რუსუდან მაჩაიძე, ხოლო მეორეზე მანანა ვარდიაშვილი გავიდა.

რაც შეეხება საუკეთესო საგაზეთო ნაშრომებს, პირველი ადგილი ლელა დუმბაძემ, ხოლო მეორე ადგილი თიკო ოსმანოვამ დაიკავა.

ხუთწევრიანმა ჟიურიმ ჟურნალისტების საუკეთესო ნაშრომები სატელევიზიო, რადიო, ბეჭდური და ელექტრონული მედიის პლატფორმიდან შეარჩია. მათი ნაწილი ფულადი პრიზებით, ნაწილი კი სიმბოლური საჩუქრებით დაჯილდოვდა.

ჟიურიმ შემდეგი კრიტერიუმებით იხელმძღვანელა - საკონსტიტუციო ცვლილებების საკითხის სიღრმისეულად გაშუქება; საკითხის ობიექტურად გაშუქება, გადმოცემის სიმარტივე, საკითხზე ჟურნალისტის კომპეტენტურობა.

მონაწილეები კი შემდეგ ნომინაციებში გამოვლინდნენ: საუკეთესო სატელევიზიო სიუჟეტი, საუკეთესო რადიო სიუჟეტი, საუკეთესო ელექტრონული ნაშრომი, საუკეთესო საგაზეთო ნაშრომი.

კონკურსი პრეზიდენტის სარეზერვო ფონდიდან დაფინანსდა, პროექტი "განათლებისა და ცნობიერების ამაღლების ინსტიტუტმა" განახორციელა.

პრეზიდენტის ადმინისტრაციაში აღნიშნავენ, რომ პროექტს კონსტიტუციის შესახებ საზოგადოებრივი აზრის ფორმირებისა და მასზე მედიის გავლენის კონტექსტში დიდი დატვირთვა აქვს.