კატალონიის რეგიონულმა პარლამენტმა დამოუკიდებლობის გამოცხადებას მხარი დაუჭირა.

დამოუკიდებლობას 70-მა დეპუტატმა მისცა ხმა, წინააღმდეგი 10 კატალონიელი იყო. კენჭისყრის დაწყებამდე, სხდომათა დარბაზი დატოვეს ოპოზიციური პარტიების წარმომადგენლებმა, რომლებიც ესპანეთისგან კატალონიის გამოყოფას ეწინააღმდეგებიან.

ამასთან, ბარსელონის ცენტრში კატალონიის დამოუკიდებლობის მომხრეთა დემონსტრაცია იმართება.

ამის პარალელურად, მადრიდში სენატი ესპანეთის კონსტიტუციის 155-ე მუხლის ამოქმედებაზე მსჯელობს,რაც კატალონიის ავტონომიის შეჩერებას ითვალისწინებს. აღნიშნული მუხლის ამოქმედების შემთხვევაში, ესპანეთის ხელისუფლება კატალონიის ლიდერსა და პარლამენტს დათხოვნას და ექვსი თვის ვადაში ვადამდელ არჩევნებს დანიშვნას ითვალისწინებს. ამას გარდა, ესპანეთის ხელისუფლების დაქვემდებარებაში გადავა კატალონიის ბიუჯეტი, პოლიცია და სახელმწიფო მედია.

ინსტიტუციის 155-ე მუხლი დემოკრატიული ესპანეთის ისტორიაში არასდროს ამოქმედებულა.

„155-ე მუხლის ამოქმედება არ არის ის შემთხვევა, რომელიც რეგულარულად ხდება: ეს ხდება პირველად 1978 წლის შემდეგ. ჩვენ განსაკუთრებული გადაწყვეტილების წინაშე ვართ, რომელიც მივიღეთ იმიტომ, რომ შეიქმნა განსაკუთრებული და სერიოზული ვითარება“, - განაცხადა მარიანო რახოიმ.

კატალონიაში ვითარება პირველ ოქტომბერს ჩატარებული ე.წ. რეფერენდუმის შემდეგ დაიძაბა. ადგილობრივმა მთავრობამ 10 ოქტომბერს მიიღო ე.წ. კატალონიის დამოუკიდებლობის დეკლარაცია, თუმცა მისი ამოქმედება გაურკვეველი ვადით გადადო და მადრიდს მოლაპარაკებები შესთავაზა. ესპანეთის მთავრობა ე.წ. რეფერენდუმის შედეგებს არ აღიარებს.