გლდანის საარჩევნო ოლქში ხმების გადათვლაზე სასამართლომ საარჩევნო ბლოკის „დიმიტრი ლორთქიფანიძე, კახა კუკავა დემოკრატიული მოძრაობა - თავისუფალი საქართველო“ სარჩელი არ დააკმაყოფილა. გადაწყვეტილება მოსამართლე ნათია ბუსკაძემ გამოაცხადა.
მოსამართლის გადაწყვეტილებით, სარჩელი არ დაკმაყოფილდა და მოსარჩელე მხარეს სახელმწიფო ბაჟის სახით 100 ლარის გადახდა დააკისრა.
თბილისის მერობის ყოფილი კანდიდატის კახა კუკავას თანაპარტიელი თენგიზ ომანაძე მოსამართლის გადაწყვეტილებას უსაფუძვლოდ მიიჩნევს. მისი შეფასებით, სასამართლო ჩართულია არჩევნების გაყალბების პროცესში.
როგორც ომანაძემ განმარტა, მათი სარჩელის მთავარი მიზეზი ორი გარემოება იყო, პირველ, როდესაც გლდანის ორ საარჩევნო უბანზე ხმების გადათვლისას აღმოჩდა, რომ „დემოკრატიულ მოძრაობას“ ამომრჩეველთა ხმები აკლდა და მეორე შემთხვევაში, ოქმები გადასწორებული იყო.
საჩივარი სასამართლოში 26 ოქტომბერს შეიტანეს. გარდა ამისა, კუკავას თანაპარტიელებს, ქვეყნის მასშტაბით, 12 საარჩევნო ოლქში ჰქონდათ საჩივარი შეტანილი, თუმცა არცერთ შემთხვევაში არ დაკმაყოფილდა.