ტყიბულში, მინდელის სახელობის შახტში, შემთხვევის ადგილზე სპეციალური კომისია მუშაობს. ამის შესახებ პირველი არხის ჟურნალისტი ადგილიდან იუწყება.

მინდელის სახელობის შახტში მთელი ღამის განმავლობაში იმყოფებოდნენ ეკონომიკისა და ჯანდაცვის სამინისტროს წარმომადგენლები. მათი გადაწყვეტილებით, ადგილზე მოპოვებითი სამუშაოები შეწყდა, რადგან სამთო მასის ჩამოშლა მიმდინარეობს. შესაბამისად, გაიცა განკარგულება, რომ შემთხვევის ადგილზე მხოლოდ გამაგრებითი და გაწმენდითი სამუშაოები ჩატარდეს.

ვიდრე ადგილი სრულყოფილად არ დათვალიერდება, შემთხვევის კონკრეტულ მიზეზებზე არ საუბრობენ. გარდა ამისა, შესასწავლია დოკუმენტაცია.

„პერიოდულად მიმდინარეობს შემოწმება, ექვს თვეში ერთხელ ან არაგეგმურად. უბედური შემთხვევების დროს, ტექნიკური ხარვეზები ხშირად არის, თუმცა კრიტიკული შეუსაბამობები იშვიათად. ძირითადად, არის პირველი ან მეორე ხარისხის არსებითი შეუსაბამობები“, - განუცხადა პირველ არხს ეკონომიკის სამინისტროს ტექნიკური და სამშენებლო ზედამხედველობის სააგენტოს უფროსმა გრიგოლ კაკაურიძემ.

ტყიბულში, მინდელის სახელობის შახტში დავით ფორჩხიძე გუშინ დაიღუპა. შსს-მ გამოძიება სისხლის სამართლის კოდექსის 240-ე მუხლის მე-2 ნაწილით დაიწყო, რაც გულისხმობს სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას, რამაც გამოიწვია ადამიანის სიცოცხლის მოსპობა ან სხვა მძიმე შედეგი.

კომპანიამ „საქნახშირი ჯი-აი-ჯი ჯგუფი“ გუშინ განცხადება გაავრცელა. კომპანიამ მწუხარება გამოთქვა მომხდართან დაკავშირებით და დაღუპულის ოჯახს მიუსამძიმრა.