რეჟისორ უტა ბერიას მხატვრული ფილმის „უარყოფითი რიცხვების“ გადაღება მიმდინარეობს.

ფილმის სიუჟეტი რეალური ისტორიებითაა აგებული და საქართველოს ეროვნული რაგბის კავშირისა და UNICEF-ის ერთობლივი პროექტია. ფილმი მოგვითხრობს, თუ როგორ შეცვალა რაგბის თამაშმა კანონთან კონფლიქტში მყოფი მოზარდების ცხოვრება. რაგბის გაკვეთილები არასრულწლოვან მსჯავრდებულთა დაწესებულებაში 2011 წელს მიმდინარეობდა.

ვეტერანმა რაგბისტებმა რაგბის თამაში 60-მდე ახალგაზრდა-მსჯავრდებულს ასწავლეს. ამ პროექტის დასრულებისა და პატიმრების გათავისუფლების შემდეგ 10-მა ყოფილმა მსჯავრდებულმა რაგბის თამაში გააგრძელა.

„უარყოფითი რიცხვების“ მთავარი გმირი ციხის ე. წ. მაყურებელია. თუმცა, რაგბის გაკვეთილების შემდეგ ხვდება, რომ სხვანაირი ცხოვრების გაგრძელება სურს და ახალ ცხოვრებას იწყებს. რეალური პროექტიცა და ფილმის მთავარი მიზანიც მსჯავრდებულთა რესოციალიზაცია, სტერეოტიპების დანგრევა და ჯანსაღი ცხოვრების წესია.

ახალი მხატვრული სოციალური ფილმის გადაღებები დაახლოებით ერთ თვეში დასრულდება და კინოეკრანებზე 2018 წელს გამოვა. ფილმი ქართულ-ფრანგულ-იტალიური კოპროდუქციაა და ეროვნული კინოცენტრის მხარდაჭერით ხორციელდება.