სამდღიანი ფორუმის მდგრადი განვითარების მიზნების ფარგლებში, ფორუმის მონაწილეებს შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა მიმართა და საქართველოს ოკუპირებულ ტერიტორიებზე და საოკუპაციო ხაზთან არსებულ ვითარებაზე ინფორმაცია გააცნო. ამასთან, მინისტრმა კონფლიქტების მოგვარების გზებთან დაკავშირებით ისაუბრა და აღნიშნა, რომ შერიგების პოლიტიკა საქართველოს ხელისუფლებისთვის ერთ-ერთ მთავარ პრიორიტეტს წარმოადგენს.
მდგრადი განვითარების მიზნების ფორუმში, რომელიც თბილისში უკვე მეორე დღეა მიმდინარეობს, 25 ქვეყნის 150-ზე მეტი წარმომადგენელი იღებს მონაწილეობას. ექვსი პლენარული სესიის ფარგლებში, ფორუმის მონაწილეები მდგრადი განვითარების მე-16 მიზნის ძირითად მიმართულებებზე: მშვიდობიანი, სამართლიანი და ინკლუზიური საზოგადოების ჩამოყალიბების საკითხებზე იმსჯელებენ.