საოკუპაციო რეჟიმმა ორი დღის წინ სოფელ ახმაჯთან დაკავებული საქართველოს ორი მოქალაქე გაათავისუფლა. ოკუპირებული ცხინვალის დროებითი დაკავების იზოლატორი 20 წლის გიორგი შუკაკიძემ და 42 წლის ჯონი თათარაშვილმა ჯარიმის გადახდის შედეგ დატოვეს. ოჯახებმა ჯარიმის სახით 2000 რუსული რუბლი გადაიხადეს. გათავისუფლებულები საოკუპაციო რეჟიმის წარმომადგენლებმა ქართველ სამართალდამცავებს ერგნეთის საგუშაგოზე გადასცეს. მათ შსს-ს შიდა ქართლის სამხარეო დეპარტამენტში დაკითხვას უტარებენ.

კასპის მუნიციპალიტეტის სოფელ ოკამის მცხოვრები გიორგი შუკაკიძე და ჯონი თათარაშვილი რუსმა სამხედროებმა 29 ოქტომბერს სოფელ ახმაჯთან ტყეში დააკავეს, სადაც ისინი შეშის მოსაჭრელად იყვნენ წასული.