ფეხბურთის ფედერაციასთან დაკავებული შვიდი პირი დიღმის მთავარ სამმართველოში გვიან ღამით გადაიყვანეს.
დაკავებიდან თითქმის ხუთი საათის შემდეგ, ისინი ადვოკატმა ცირა ჯავახიშვილმა მოინახულა. მისი განცხადებით, დაკავებულთა უმეტესობა ნაცემია.
უფლებადამცველის ინფორმაციით, მისი დაცვის ქვეშ მყოფებისთვის გაუგებარია თუ რატომ იმყოფებიან იზოლატორში, ვინაიდან მათი დაკავების მუხლის შესაბამისი დანაშაული არ ჩაუდენიათ. საუბარია პოლიციისადმი წინააღმდეგობის გაწევასა და წვრილმან ხულიგნობაზე.
დაკავებულები ქართველთა მარშის მიერ გუშინ გამართული აქციის მონაწილეები არიან, რომლებიც ფედერაციის პრეზიდენტის ლევან კობიაშვილის თანამდებობიდან გადაყენებას მოითხოვდნენ. ამის მიზეზად კი ფედერაციის მხრიდან ფეხბურთელ გურამ კაშიასადმი გამოცხადებულ მხარდაჭერას ასახელებდნენ. კაშიამ ჰოლანდიის ჩემპიონატის ერთ-ერთ ტურში ლგბტ პირთა მხარდამჭერი სამკლაურით იასპარეზა.
აქციის მონაწილეებმა ფედერაციასთან პროტესტის ნიშნად ლგბტ დროშა დაწვეს, მოგვიანებით კი შენობაში მაშხალები შეყარეს, რასაც სამართალდამცველთა მხრიდან ადმინისტრაციული წესით რამდენიმე აქტივისტის დაკავება მოჰყვა.
სასამართლო პროცესი, სავარაუდოდ, დღეს გაიმართება, პროცესზე ქართველთა მარშის წარმომადგენლები დაკავებულთა უპირობო გათავისუფლებას მოითხოვენ.