პარლამენტის დეპუტატის, ირაკლი ხახუბიას შვილის, ბექა ხახუბიას დაღუპვის საქმეში ბრალდებული საპატრულო პოლიციის თანამშრომლების პროცესი გორის რაიონულ სასამართლოში ამ წუთებში მიმდინარეობს.

დღევანდელ სხდომაზე ბრალდების მხარის მოწმეთა დაკითხვა გრძელდება. იკითხება ტრაილერის მძღოლი გიორგი ღლონტი. მოწმემ მოყვა, როგორ გადაკეტა გზა და ვისი მოთხოვნით, ასევე სად გაჩერდა ევაკუატორი და სად იდგა ამ დროს საპატრულო პოლიციის ავტომანქანა. გიორგი ღლონტმა ასევე ისაუბრა იმ საფრთხეებზე, რომელიც, მისი თქმით, მომხდარი ავტოსაგზაო შემთხვევის დროს მას ემუქრებოდა.

ბრალდების მხარეს აინტერესებდა, დარჩენილი იყო თუ არა გასასვლელი ტრაილერით გზის გადაკეტვის შემდეგ და დაინახავდა თუ არა მას გარდაცვლილი. როგორც მოწმემ სასამართლო პროცესზე განაცხადა, ევაკუატორი ისე ეყენა, რომ გასასვლელი არ ჩანდა.

მოწმის დაკითხვის დაწყებამდე, დაცვის მხარემ სასამართლოს სპეციალური განცხადება გააცნო და ბექა და გიორგი ხახუბიების დაჯარიმების შესახებ ინფორმაცია გამოითხოვა. 27ოქტომბერს გამართულ პროცესზე უფლებამონაცვლის სახით დაკითხული გიორგი ხახუბიამ დაკითხვისას განაცხადა, რომ მისი ძმის გარდაცვალებამდე მათი დაჯარიმება სისტემატურად ხდებოდა.

საპატრულო პოლიციის ყოფილ თანამშრომლებს, ნუკრი ხაბელაშვილს, გიორგი სადაღაშვილსა და ზურაბ რუსიშვილს, რომლებსაც უფლებამოსილება შეუჩერდათ, ბრალი სსკ-ის 116-ე და 333-ე მუხლებით წარედგინათ, რაც გაუფრთხილებლობით სიცოცხლის მოსპობას და სამსახურებრივი უფლებამოსილების გადამეტებას გულისხმობს.

ძლიერი შეჯახების შედეგად, გორთან ახლოს, ავტომაგისტრალზე მდებარე გვირაბთან, ბექა ხახუბია 17 მაისს გარდაიცვალა.