ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ვიქტორ დოლიძე სამუშაო ვიზიტით გერმანიის ფედერაციულ რესპუბლიკაში, ქ.ბერლინში გაემგზავრა, სადაც 9-11 ნოემბერს შეხვედრები გამართა უსაფრთხოებისა და საგარეო პოლიტიკის საკითხებში გერმანიის ფედერალური კანცლერის მრჩევლის მოადგილესთან იოახიმ ბერტელესთან, გერმანიის საგარეო საქმეთა სამინისტროს უსაფრთხოების პოლიტიკის დეპარტამენტის დირექტორთან ბეტინა კადენბახთან, გერმანიის პარლამენტში მმართველი პარტიის წარმომადგენელთან საგარეო და თავდაცვის კომიტეტებში, ქრისტიან-დემოკრატიული კავშირის დეპუტატ როდერიხ კიზევეთერთან, აგრეთვე, კონრად ადენაუერისა და ფრიდრიხ ებერტის ფონდების, მიუნხენის უსაფრთხოების კონფერენციის ხელმძღვანელებთან.
შეხვედრებზე „აღმოსავლეთ პარტნიორობის“ სამიტისთვის მზადების საკითხები, ნატო-ში ინტეგრაციის პროცესი და საქართველოს მიერ რეფორმების განხორციელების კუთხით დაფიქსირებული პროგრესი განიხილეს.
გერმანული მხარის მიერ აღინიშნა საქართველოს, როგორც აღმოსავლეთ პარტნიორობის მონაწილე ქვეყნის პროგრესი. მასპინძელი მხარის წარმომადგენლებმა განსაკუთრებული მადლიერება გამოხატეს გასულ წელს, ავღანეთის ქალაქ მაზარ-ი-შარიფში, გერმანიის გენერალურ საკონსულოზე შეიარაღებული თავდასხმის დროს ქართული ოცეულის რეაგირების გამო და ხაზი გაუსვა სამხედროების პროფესიონალიზმს.