საქართველოში მცხოვრები ეთნიკური და რელიგიური უმცირესობების საკითხებზე მუშაობა საზოგადოებრივი მაუწყებლის ერთ-ერთი პრიორიტეტი ხდება.

მაუწყებლის გენერალურმა დირექტორმა ვასილ მაღლაფერიძემ  ეროვნული და რელიგიური უმცირესობების წარმომადგენლებთან თანამშრომლობის მემორანდუმი გააფორმა. მისი განცხადებით, მედიასტრატეგიის ფარგლებში, რამდენიმე მიმართულებაა გათვალისწინებული.

ერთ-ერთი მთავარი, საქართველოში მცხოვრები ეთნიკური უმცირესობებისთვის ინფორმაციის მათ ენაზე მიწოდებაა. ვებ-პლატფორმა უკვე ხელმისაწვდომია შვიდ ენაზე, სულ მალე კი 1tv.ge-ს აპლიკაცია ჩაეშვება, საიდანაც ინფორმაციის გამოწერა მომხმარებლისთვის სასურველ ენაზე იქნება შესაძლებელი.

ამასთან, საზოგადოებრივი მაუწყებლის გენერალური დირექტორის თქმით, იგეგმება აზერბაიჯანულ და სომხურენოვანი რადიოგადაცემების მომზადება.

პარალელურად, საზოგადოებრივი მაუწყებელი მუშაობას აძლიერებს რეგიონებში, სადაც რელიგიური და ეროვნული უმცირესობების თემაზე მომუშავე ჟურნალისტები შეირჩევიან.

ამასთან, მაუწყებელში შეიქმნება მრჩეველთა საბჭოც, რომელიც მემორანდუმის ეფექტურ იმპლემენტაციას შეუწყობს ხელს.

შეგახსენებთ, დღეს ტოლერანტობის საერთაშორისო დღეა. მემორანდუმის გაფორმება სწორედ ამ თარიღს დაემთხვა.

[related_news id="44024" align="left"][related_news id="31998" align="left"]