"X-ფაქტორში" გავალთ, უკვე გადაწყვეტილი ამბავია" - მოუსმინეთ, როგორ მღერიან ქართველი ფეხბურთელები

ქუთაისის "ტორპედომ" სეზონის წარმატებული დასრულება და ჩემპიონობა ბანკეტით აღნიშნა. მისი ამსახველი სურათები და კადრები სოციალურ ქსელში გავრცელდა და დიდი მოწონება დაიმსახურა – განსაკუთრებით, გუგა ფალავანდიშვილის, ბიძინა მახარობლიძისა და მერაბ გიგაურის შესრულებულმა სიმღერამ - "სამშობლო". მართალია, ერთ-ერთი ამ სამეულში ხმას პერიოდულად და აშკარად ურევდა (რომელი, ბოლომდე ვერ დავაზუსტეთ), მაგრამ მაინც გამოჩნდა, რომ ჩემპიონებს მხოლოდ ფეხბურთის ნიჭი არ გააჩნიათ.გულშემატკივრები ხუმრობოდნენ, ეს ბიჭები "X-ფაქტორშიც" არ დაიჩაგრებიანო. აღმოჩნდა, რომ გიგაურს ცხოვრებაში პირველად უმღერია, მაგრამ არ აკონკრეტებს, ხმას ვინ ურევდა.
"ბიჭები სერიოზულად უნდა დავფიქრდეთ, "X-ფაქტორში" ხომ არ გავიდეთ. ამ სიმღერას ისეთი გამოხმაურება მოჰყვა, მგონი, ღირს ამ სფეროშიც ვცადოთ ბედი და მინიმუმ, ერთ ტურს მაინც გადავლახავთ. ისე, ხუმრობა იქით იყოს და ასე საჯაროდ პირველად ვიმღერე. აქამდე ჩემი ვოკალური გამოცდილება კარაოკეს არ გაცდენია" – ამბობს გიგაური.სამეულის სასცენო პერსპექტივის შეფასება პირველ ხმას, ფალავანდიშვილსაც ვთხოვეთ, რომელიც ამ თემამ ძალიან გაამხიარულა: "მოვა დრო და ვიტყვი, ხმას ვინ ურევდა. მაგრამ ის, რომ ნიჭიერში" ან "X-ფაქტორში" გავალთ, უკვე გადაწყვეტილი ამბავია. უკვე რამდენიმე რესტორნიდან დამიკავშირდნენ და შემოთავაზება მივიღე – ფეხბურთის პარალელურად იქნებ, ამაშიც ვცადოთ ბედი".