ტრამპის გაფრთხილებამ გაეროს წევრი ქვეყნების დიდ ნაწილზე არ გაჭრა. გენერალური ასამბლეის კენჭისყრის შემდეგ მთავარი კითხვაა - იქცევა თუ არა თეთრი სახლის ლიდერის მუქარისშემცველი გზავნილი რეალობად და შეუწყდება თუ არა ამერიკის ფინანსური დახმარება იმ ქვეყნებს, რომლებმაც გუშინ თურქეთის და იემენის მიერ წარდგენილ რეზოლუციას მხარი დაუჭირეს.
ვისი დედაქალაქია იერუსალიმი - ამ კითხვაზე საპასუხოდ მსოფლიოს 172 სახელმწიფო გაეროში უმაღლეს ფორუმზე შეიკრიბა. ისტორიულ ქალაქზე პრეტენზებს ებრაელები და არაბები აცხადებენ და არგუმენტებიც აქვთ. ისრაელი იერუსალიმზე ისტორიულ უფლებებს 3 ათასი წლით ათარიღებს, არაბები კი ამბობენ, რომ 3 რელიგიის წარმოშობის ადგილზე მონოპოლიის დაწესება დაუშვებელია. გუშინდელმა კენჭისყრამ აჩვენა, რომ მსოფლიოს ქვეყნების უმრავლესობა იერუსალიმს ორი სახელმწიფოს დედაქალაქად აღიარებს.