იუსტიციის სამინისტროში ნარკომანიის წინააღმდეგ ბრძოლის უწყებათშორისი საკოორდინაციო საბჭოს სხდომა გაიმართა. შეხვედრაში მონაწილეობა მიიღო შინაგან საქმეთა მინისტრმა გიორგი გახარიამ.

იუსტიციის მინისტრს ნარკომანიასთან ბრძოლის უწყებათშორისი საკოორდინაციო საბჭოს სხდომის მოწვევის თხოვნით შინაგან საქმეთა მინისტრმა მიმართა. როგორც გიორგი გახარიამ განაცხადა, ეს არის ერთ-ერთი ყველაზე მნიშვნელოვანი ფორმატი, რომლითაც შესაძლებელი იქნება ამ მიმართულებით პროგრესის მიღწევა.

უწყებათშორისი საბჭოს სხდომაზე შინაგან საქმეთა მინისტრმა ხაზი გაუსვა უწყებების კომპლექსური მუშაობის მნიშვნელობას და ნარკოპოლიტიკის მოწესრიგებისთვის სწრაფი, ერთობლივი და ქმედითი ნაბიჯების გადადგმას.

„ვხედავთ, რომ დისკუსია, ნარკოპოლიტიკის თემაზე, დროში გახანგრძლივდა და ეს არ ეხმარება მდგომარეობის გაუმჯობესებას. ჩვენ ამას ვამბობთ სტატისტიკურ მონაცემებზე დაყრდნობით და განსაკუთრებით იმ ნაწილში, რაც ეხება ქვეყანაში ნარკოსაშუალებების შემოსვლას და მათ რეალიზაციას. აქ ჩვენ, რეალურად, ვხედავთ სერიოზულ რისკებს. ამ მიმართულებით მკაცრი მიდგომები არა თუ შესანარჩუნებელია, ხშირ შემთხვევაში, გასამკაცრებელია.

მიუხედავად ამისა, ჩვენ ძალიან კარგად გვესმის, რომ ჰუმანური და კომპლექსური ნარკოპოლიტიკა არის ერთადერთი გამოსავალი. ნარკოტიკების მოხმარებასთან ჰუმანური მიდგომა უნდა იყოს აბსოლუტურად დაბალანსებული, რათა ბალანსი ჰუმანურობასა და მოხმარების წახალისებას შორის იყოს ერთმნიშვნელოვნად დაცული. ეს არ უნდა იყოს მოხმარების წახალისების პროვოცირება. ნარკოპოლიტიკის ძირითადი ამოცანა უნდა იყოს, არ გაჩნდნენ ახალი მომხმარებლები და მოხდეს მომხმარებლების რეაბილიტაცია.

ჩვენ ვნახეთ, რომ ძალზედ ბევრი კონკრეტული ნაბიჯია გადადგმული, რომლებმაც კონკრეტულ შედეგამდე მიგვიყვანა და შესაბამისად, ჩავთვალეთ, რომ სჯობს ყველა უწყებას, ერთ პლატფორმაზე, კონცენტრირებულად ჰქონდეს საშუალება, გამოთქვას აზრი. ეს დაგვეხმარება სწრაფად და მაქსიმალურად ობიექტურად მივიდეთ საბოლოო გადაწყვეტილებამდე.

როდესაც ვიღებთ ძალიან მნიშვნელოვან საკანონმდებლო ცვლილებებს, უნდა გვქონდეს კონკრეტული გეგმა და აბსოლუტურად მკაფიო ხედვა, ყველა მიმართულებით.

ჩვენ ვემხრობით ჰუმანურ მიდგომებს, გვინდა, რომ დავიცვათ ბალანსი, თუმცა ჩვენი ჰუმანური მიდგომები არ უნდა გახდეს წახალისების მაპროვოცირებელი და გვინდა, რომ გვქონდეს კონკრეტული გეგმა - რას ვაკეთებთ და რა პერიოდში. ჩვენ მზად ვართ, ამ ფორმატში ძალიან აქტიურად მივიღოთ მონაწილეობა,“ - განაცხადა შინაგან საქმეთა მინისტრმა გიორგი გახარიამ.

Facebook : https://www.facebook.com/miaofgeo
Twitter : https://twitter.com/MIAofGeorgia
Myvideo : http://www.myvideo.ge/?user_id=1560804