ლიტვის დელეგაციის წევრებმა უწყებათშორის შეხვედრაში მიიღეს მონაწილეობა
ლიტვის რესპუბლიკის თავდაცვის სამინისტროს დელეგაციის ვიზიტი საქართველოში კიბერუსაფრთხოების თემაზე უწყებათშორისი შეხვედრით გაგრძელდა.
გაფართოებულ შეხვედრაზე ლიტვის რესპუბლიკის თავდაცვის მინისტრის მოადგილეს ედვინას კერზასს, საქართველოში ლიტვის ელჩს გიედრიუს პუოჯუნასსა და ლიტვის თავდაცვის ატაშეს, ვიცე-პოლკოვნიკი ვიტაუტას რაკაუსკას საქართველოს თავდაცვის მინისტრის პირველმა მოადგილემ ლელა ჩიქოვანმა, შეიარაღებული ძალების გენერალური შტაბის უფროსის პირველმა მოადგილემ, პოლკოვნიკმა ნიკოლოზ ჯანჯღავამ და თავდაცვის უწყების სხვა მაღალჩინოსნებმა უმასპინძლეს.
თავდაცვის სამინისტროში გამართულ ღონისძიებაში კიბერუსაფრთხოების პოლიტიკის შემუშავების მონაწილე სახელმწიფო უწყებების წარმომადგენლები მონაწილეობდნენ. საქართველოს თავდაცვის, შინაგან საქმეთა, ასევე იუსტიციის სამინისტროებისა და სახელმწიფო უსაფრთხოების სამსახურის თანამშრომლებმა ლიტვურ მხარესთან კიბერუსაფრთხოების კუთხით არსებული გამოწვევები განიხილეს და უწყებათშორისი, ასევე საერთაშორისო გამოცდილების გაზიარების მნიშვნელობა ხაზგასმით აღნიშნეს.
ქართულმა და ლიტვურმა მხარეებმა კიბერუსაფრთხოების პოლიტიკის შესახებ პრეზენტაციებიც წარმოადგინეს.
ღონისძიებაზე ლიტვის დელეგაციის სხვა წევრები, ნატო-საქართველოს არსებითი პაკეტის ძირითადი ჯგუფისა და აშშ-ის არმიის ჯორჯიის შტატის ეროვნული გვარდიის წარმომადგენლებიც იმყოფებოდნენ.