„ერთი დღე ჯარში" - რეგიონული მედიის წარმომადგენლებისთვის

საქართველოს სხვადასხვა რეგიონიდან ჩამოსულ ჟურნალისტებს ორი დღის განმავლობაში IV მექანიზებულ ბრიგადაში ცხოვრების, სამხედრო მოსამსახურეებთან შეხვედრის, ფიზიკური აქტივობების განხორციელებისა და ჯარისკაცის მენიუს დაგემოვნების საშუალება ჰქონდათ.

ვაზიანსა და კრწანისში ქართული მედიის წარმომადგენლებმა საქართველოს ნატოში ინტეგრაციის პერსპექტივებზე, ნატო-საქართველოს წვრთნებისა და შეფასების ერთობლივ ცენტრის (JTEC) როლზე, ნატო-საქართველოს არსებითი პაკეტით (SNGP) გათვალისწინებულ ინიციატივებზე, საერთაშორისო სამშვიდობო მისიებში საქართველოს მონაწილეობაზე მნიშვნელოვანი ინფორმაციები სპეციალურად გამართულ პრეზენტაციებზე მოისმინეს. ჟურნალისტებს მოხსენებები ნატო-საქართველოს არსებითი პაკეტის (SNGP) ძირითადი ჯგუფის (NATO Core Team) ლიდერმა, საზღვაო კაპიტანმა, შტეფან ანიქოფერმა, ნატო-საქართველოს წვრთნებისა და შეფასების ერთობლივი ცენტრის (JTEC) მრჩეველთა ჯგუფის ხელმძღვანელმა, ვიცე-პოლკოვნიკმა მარიუს ნილსენმა, ნატო-საქართველოს წვრთნებისა და შეფასების ერთობლივი ცენტრის (JTEC) შტაბის უფროსმა, ვიცე-პოლკოვნიკმა დავით გაგუამ,ეროვნული გვარდიის G-5 სამსახურის უფროსმა, ვიცე-პოლკოვნიკმა ირაკლი უჩაძემ და ნატოსა და ევროკავშირის შესახებ საინფორმაციო ცენტრის დირექტორმა, ნინო ბოლქვაძემ წაუკითხეს და მათ კითხვებს უპასუხეს.

სამხედრო ბაზებზე ვიზიტის განმავლობაში სტუმრებისთვის სიმულაციური ცენტრებისა და სამხედრო ტექნიკის დათვალიერებაც საინტერესო აღმოჩნდა.
ნატოს კვირეული საქართველოში მეთერთმეტედ ტარდება. ღონისძიება საქართველოს თავდაცვის სამინისტროსა და სსიპ "ნატოსა და ევროკავშირის შესახებ საინფორმაციო ცენტრის" ორგანიზებით გაიმართა.