„გენერალი გიორგი კვინიტაძე - გაცოცხლებული ისტორია“
„გენერალი გიორგი კვინიტაძე - გაცოცხლებული ისტორია“ - ამ სახელწოდების გამოფენა გაიმართა საქართველოს დამოუკიდებლობის დღეს, შოთა რუსთაველის სახელობის სახელმწიფო დრამატული თეატრის ფოიეში. ღონისძიებაზე ქართველ საზოგადოებას გენერალ გიორგი კვინიტაძის აღდგენილი სამოსი - გენერლის მუნდირი, ორი სამხედრო ფარაჯა, ჩოხა და ახალუხი, ქალიშვილის - ნანო კვინიტაძის ეროვნული კაბა, ასევე სამხედრო მოღვაწის ხელნაწერები, ხატი და ხმოვანი ჩანაწერები პირველად წარედგინა. გამოფენა საქართველოს თავდაცვის სამინისტროსა და კორნელი კეკელიძის სახელობის ხელნაწერთა ეროვნული ცენტრის ორგანიზებით ჩატარდა და საქართველოს პირველი დემოკრატიული რესპუბლიკის 100 წლის იუბილეს მიეძღვნა. „აღვადგინეთ პირველი რესპუბლიკის შეიარაღებული ძალების ხელმძღვანელის, გენერალ კვინიტაძის სამოსი, რითაც გავაცოცხლეთ ისტორია. სიმბოლურია, რომ დღევანდელ დღეს, გენერლის შვილიშვილი ჩვენთან ერთად ზეიმობს. ეს არის, სწორედ, იმ პასუხისმგებლობის გაგრძელება, რა პასუხისმგებლობითაც გენერალმა და მისმა თანამებრძოლებმა საფუძველი ჩაუყარეს პირველ დემოკრატიულ რესპუბლიკას საქართველოში და გაითავისეს, რომ ღირებულებებს, რის საფუძველზეც ეს სახელმწიფო შეიქმნა, დაცვა სჭირდება“, - აღნიშნა, სიტყვით გამოსვლისას, საქართველოს თავდაცვის მინისტრმა ლევან იზორიამ. თავდაცვის მინისტრმა პროექტის განხორციელების საქმეში ჩართულ თითოეულ ადამიანს მადლობა გადაუხადა. გამოფენის გახსნის ცერემონიალზე საზოგადოებას საქართველოს განათლებისა და მეცნიერების მინისტრმა, მიხეილ ჩხენკელმაც მიმართა და უწყებათაშორისი თანამშრომლობის შესახებ ისაუბრა. კორნელი კეკელიძის სახელობის ხელნაწერთა ეროვნული ცენტრის დირექტორმა, ისტორიკოსმა ზაზა აბაშიძემ საქართველოს ისტორიაში გენერალ კვინიტაძის წვლილისა და მისი პიროვნების შესახებ გაამახვილა ყურადღება. გამოფენას დაესწრნენ დამოუკიდებლობის დღისთვის საქართველოში სპეციალურად ჩამოსული ემიგრანტები, რომელთა შორის გენერალ კვინიტაძის შთამომავლებიც იყვნენ. გენერლის შვილიშვილმა, მერაბ ოდიშელიძემ ღონისძიების ორგანიზატორებს ბაბუის დაფასებისთვის მადლობა გადაუხადა.
ღონისძიებაზე საზოგადოებას წარედგინა ვიდეორგოლიც, სადაც საუბარია საქართველოს ისტორიაში გენერლის როლისა და მისი პიროვნების შესახებ, ასევე პროექტის განხორციელების პროცესზე. გენერლის სამოსის აღდგენის პროცესი საქართველოს თავდაცვის სამინისტროსა და კორნელი კეკელიძის სახელობის ხელნაწერთა ეროვნული ცენტრის თანამშრომლობით განხორციელდა. 2007 წელს საფრანგეთში მცხოვრებმა კვინიტაძის ქალიშვილმა, ნანომ, გენერლის პირადი არქივი ხელნაწერთა ეროვნულ ცენტრს გადასცა. 2014 წელს გენერალ კვინიტაძის სამოსის კოლექციის აღდგენის პროცესში ახალგაზრდა კალიგარფები ჩაერთნენ. მათ უნიკალური ნამუშევრების გამოფენა-გაყიდვით შეძლეს გარკვეული თანხის მობილიზება, რაც კოლექციის მცირე ნაწილის აღდგენას მოხმარდა, რის შემდეგაც გენერალ კვინიტაძის სრული კოლექციის რესტავრაციის საკითხში თავდაცვის სამინისტრო ჩაერთო და პროცესის ფინანსური უზრუნველყოფა სრულად საკუთარ თავზე აიღო. გენერალ კვინიტაძის სამოსის კოლექცია უმძიმეს მდგომარეობაში იყო. სარესტავრაციო სამუშაოები საქართველოს ეროვნული მუზეუმის რესტავრაცია-კონსერვაციის ჯგუფის წევრებმა 6 თვის განმავლობაში ჩაატარეს. ღონისძიების დასრულების შემდეგ, გენერალ კვინიტაძის აღდგენილი სამოსი ერთი წლით თავდაცვის სამინისტროში განთავსდება, მოგვიანებით კი, ხელნაწერთა ეროვნულ ცენტრში გიორგი კვინიტაძის სახელობის კაბინეტში გადაინაცვლებს და ეროვნული დღესასწაულების აღნიშვნისას მნიშვნელოვანი დატვირთვა ექნება. ღონისძიების სტუმრებს საჩუქრად გიორგი კვინიტაძის „ჩემი მოგონებების“ ორტომეული გადაეცათ. გენერლის მემუარული ნაწარმოების მიმართ საზოგადოების დიდი ინტერესის გამო, წიგნი მესამედ გამოიცა. ღონისძიებაზე წარდგენილ ვიდეორგოლსა და წიგნებში გამოყენებულია კალიგრაფ დავით მაიურაძის მიერ სპეციალურად შექმნილი გიორგი კვინიტაძის სახელობითი შრიფტი.