ACB ლიგის ფინალური სერიის პირველ მატჩში თორნიკე შენგელიას ბასკონიამ მოულოდნელად მადრიდში დაამარცხა მადრიდის რეალი - 94:90.

ბასკთა ქართველმა კაპიტანმა ყველაზე მეტი დრო გაატარა მოედანზე, ის სასტარტო ხუთეულში იყო და 30:06 წუთი ითამაშა.

შენგელიას ანგარიშზე 12 ქულა, 7 მოხსნა, 3 პასი და 1 ჩაჭრაა. თოკომ 4-ჯერ დაკარგა ბურთი და 3-ჯერ დაჯარიმდა. თუმცა ყველაზე მთავარი მეტოქის მოედანზე მოგებაა, მეტოქის, რომელიც გამარჯვების მთავარ ფავორიტად ითვლებოდა. თამაშს ინტრიგა ბოლო წამებამდე ამერიკელმა ჯეისი კეროლმა შეუნარჩუნა, რომელმაც სამქულიანებით აიკლო მეტოქე და ჯამში 20 ქულა ჩააგდო, თუმცა ბასკონიამ მოპოვებული უპირატესობა მაინც შეინარჩუნა. სტუმართა რიგებში ბომბარდირი არგენტინელი ლუკა ვილდოსა იყო 16 ქულით.

შენგელიას მარგი ქმედების კოეფიციენტი - 15 - გუნდში მესამე შედეგი იყო ვილდოსასა (18) და პოარიეს (17) შემდეგ.

ბასკებმა შეძლეს რეალის მთავარი იარაღის, ლუკა დონჩიჩის შეჩერება, რომელმაც მხოლოდ 10 ქულა ჩააგდო.