სამეთაურო-საშტაბო სწავლება „გელათი 2018“ გაიხსნა

საქართველოს შეიარაღებული ძალების სახმელეთო ჯარების დასავლეთ სარდლობისა და ნატო-საქართველოს წვრთნებისა და შეფასების ერთობლივი ცენტრის (JTEC) ორგანიზებით, „გელათი 2018“ დაიწყო. ტაქტიკურ-ოპერატიული დონის სამეთაურო საშტაბო-სწავლება მესამე ქვეითი ბრიგადის ტერიტორიაზე გაიმართება და მასში დასავლეთ სარდლობის, წვრთნებისა და სამხედრო განათლების სარდლობის, ავიაციისა და საჰაერო თავდაცვის სარდლობის, სპეციალური ოპერაციების ძალების, სამხედრო პოლიციის დეპარტამენტისა და შინაგან საქმეთა სამინისტროს ქვედანაყოფები მონაწილეობენ.
„გელათი 2018“ დღეს სახმელეთო ჯარების დასავლეთ სარდალმა, ბრიგადის გენერალმა გიორგი მათიაშვილმა გახსნა, მონაწილეებს სიტყვით მიმართა და ყურადღება უწყებათაშორის თანამშრომლობაზე გაამახვილა. სწავლება მიზნად ისახავს იმ კომპონენტების დახვეწას, რაც აუცილებელია საბრძოლო მოქმედებებისა და თავდაცვის ოპერაციების წარმოების დროს.
სამეთაურო-საშტაბო სწავლება განხორციელდება კომპიუტერის გამოყენებით, რომელიც ბრიგადის თავდაცვითი ოპერაციების შემუშავებასა და გაუმჯობესებაზე იქნება ფოკუსირებული. სწავლების ყველა ფაზაში ნატოს კოლექტიური წვრთნებისა და სწავლებების სახელმძღვანელოს დირექტივები გამოიყენება.
„გელათი 2018“-ის მოსამზადებელი ფაზა 26-29 ივნისს ჩატარდება, 2-6 ივლისს კი მესამე ქვეითი ბრიგადა აღსრულების ფაზას უმასპინძლებს.