საქართველოში სამუშაო ვიზიტით ისრაელის თავდაცვის ძალების წარმომადგენლები იმყოფებიან. დელეგაციის წევრებს, ადამიანური რესურსების დაგეგმვისა და მართვის განყოფილების უფროსის, ბრიგადის გენერალ ერან შანის ხელმძღვანელობით, თავდაცვის მინისტრის პირველმა მოადგილემ, ლელა ჩიქოვანმა და გენერალური შტაბის უფროსის მოადგილეებმა უმასპინძლეს.
ვიზიტის მიზანს თავდაცვის სფეროში თანამშრომლობის საკითხების განხილვა, კონკრეტულად რეზერვისა და მობილიზაციის სისტემის მიმართულებით ისრაელის გამოცდილების გაზიარება წარმოადგენს. საქართველოში სამდღიანი ვიზიტის ფარგლებში ეროვნულ გვარდიაში ისრაელის თავდაცვის ძალების წარმომადგენლებს საქართველოს შეიარაღებულ ძალებში რეზერვისა და მობილიზაციის სისტემას გააცნობენ, რომელიც საპილოტე რეჟიმში აგვისტოდან ამოქმედდება.
ისრაელის დელეგაციის წევრები გენერალური შტაბის სხვადასხვა სტრუქტურული ერთეულის წარმომადგენლებს შეხვდებიან და თავდაცვის ინსტიტუციური აღმშენებლობის სკოლას (DIB) ესტუმრებიან.