„ქარიშხალი 2018“ დასრულდა
ორფოლოს პოლიგონზე „ქარიშხალი 2018“ საჩვენებელი სწავლებით დასრულდა. დასკვნით საველე სწავლებაში II ქვეითი ბრიგადის 23-ე ქვეითი ბატალიონი, 21-ე შერეული ჯავშანსატანკო ბატალიონი, 24-ე საარტილერიო ბატალიონი, ასევე ტანკსაწინააღმდეგო, ჰაერსაწინააღმდეგო და საინჟინრო ოცეულები მონაწილეობდნენ. II ქვეითი ბრიგადას მხარს უჭერდა IV საარტილერიო ბრიგადის რეაქტიული ბატალიონი.
სამხედრო მოსამსახურეებმა საბრძოლო სროლები განახორციელეს და რეალობასთან მაქსიმალურად მიახლოებული თავდაცვითი ოპერაცია შეასრულეს.
საჩვენებელ სწავლებას სახმელეთო ჯარების დასავლეთ სარდალი, ბრიგადის გენერალი გიორგი მათიაშვილი დაესწრო. სწავლების სცენარი თავდაცვითი ოპერაციების მართვას ითვალისწინებდა. 2-კვირიანი საველე სწავლება 4 ეტაპად განხორციელდა და ტაქტიკური ჯგუფის მართვისა და კონტროლის პროცედურების დახვეწას ისახავდა მიზნად.