"სალვუს დეველოპმენტის" მფლობელი გიორგი სოზაშვილი სამართალდამცველებმა ადმინისტრაციული წესით დააკავეს. მას 173-ე მუხლის დარღვევას ედავებიან, რაც პოლიციის მოთხოვნის დაუმორჩილებლობას გულისხმობს. დაკავებას წინ სიტყვიერი შელაპარაკებაც უძღვოდა, სოზაშვილი წინასწარი დაკავების იზოლატორშია გადაყვანილი და მის საქმეზე სასამართლო დღეს იმსჯელებს.
სოზაშვილი ვაკე-საბურთალოს პოლიციის განყოფილებაში მას შემდეგ მივიდა, რაც შსს-ს კრიმინალური პოლიცია ლისის ტბის მიმდებარე ტერიტორიაზე მდებარე მის კუთვნილ ბიტკოინების "დატა-ცენტრში" შევიდა, უწყების ინფორმაციით, სოზაშვილი ელექტროენერგიას უკანონოდ მოიხმარდა, გამოძიება ქურდობის მუხლით მიმდინარეობს.
გიორგი სოზაშვილის ინფორმაციით, ის "ენერგოპროს" თანხას უხდიდა, თუმცა, ამ ინფორმაციას "ენერგო პრო ჯორჯიაში" კატეგორიულად უარყოფენ და აცხადებენ, რომ სოზაშვილი აბონენტად რეგისტრირებული არასდროს ყოფილა.