ქართველი მშვიდობისმყოფელის დღე ავღანეთში

ავღანეთში, ბაგრამის საავიაციო ბაზაზე ქართველი მშვიდობისმყოფელის დღე აღინიშნა. ცერემონიალს ავღანეთში საქართველოს შეიარაღებული ძალების უფროსი სამხედრო წარმომადგენელი, პოლკოვნიკი კახა ტაბატაძე, ბაგრამის საავიაციო ბაზის მეთაური, პოლკოვნიკი ჯეკოპ პეტერსონი და ბაგრამის საავიაციო ბაზაზე დისლოცირებული კოალიციური ძალების მოქმედი ქვედანაყოფების მეთაურები დაესწრნენ. ღონისძიების ფარგლებში საქართველოს შეიარაღებული ძალების I ქვეითი ბრიგადის მე-11 ბატალიონის პირადმა შემადგენლობამ და საზღვაო ქვეითთა კორპუსის ქართული სამეკავშირეო ჯგუფის წევრებმა, ოპერაციის რაიონში იმიტირებული კომბინირებული პატრული განახორციელეს. სწავლება ქართველი მშვიდობისმყოფელების მიერ შემუშავებული გეგმით განხორციელდა და მის მიზანს თვითმკვლელის აფეთქების შედეგად დაშავებულთა ევაკუაცია წარმოადგენდა. მშვიდობისმყოფელის დღესთან დაკავშირებით ქართველი, პოლონელი, ჩეხი და ამერიკელი სამხედრო მოსამსახურეების მონაწილეობით სპორტული აქტივობებიც ჩატარდა. ქართველმა მშვიდობისმყოფელებმა ინტელექტუალური თამაში ”რა? სად? როდის?” შიდა ტურნირიც გამართეს, რომლის გამარჯვებული I ქვეითი ბრიგადის მე-11 ბატალიონის შტაბის გუნდი გახდა. I ქვეითი ბრიგადის მე-11 ბატალიონის პირადი შემადგენლობის სამხედრო მოსამსახურეები მადლობის სიგელებით, ხოლო ტურნირის მონაწილეები ფასიანი საჩუქრებით დაჯილდოვდნენ. მშვიდობისმყოფელები სტუმრებს ქართული ტრადიციული კერძებითაც გაუმასპინძლდნენ. ღონისძიების დასასრულს ქართველი მშვიდობისმყოფელები მე-11 ბატალიონის კაპელანმა, მამა დავით კასრაძემ დალოცა. 31 აგვისტო მშვიდობისმყოფელის დღედ 2016 წელს, თავდაცვის მინისტრის, ლევან იზორიას გადაწყვეტილებით დაწესდა.1999 წელს, პირველი ქართული სამშვიდობო ოცეული კოსოვოში სამშვიდობო მისიის შესასრულებლად, სწორედ ამ დღეს გაემგზავრა.