ლელა ჩიქოვანის შეხვედრა ნატოს გენერალური მდივნის მოადგილესთან
საქართველოს თავდაცვის მინისტრის პირველი მოადგილე ლელა ჩიქოვანი ნატოს გენერალური მდივნის მოადგილეს როუზ გიოტმიოლერს შეხვდა. თავდაცვის ინსტიტუციური აღმშენებლობის სკოლაში (DIB) გამართულ უწყებათშორის შეხვედრას გენერალური შტაბის უფროსი, გენერალ-მაიორი ვლადიმერ ჩაჩიბაია დაესწრო.
შეხვედრის დროს მხარეებმა საქართველოს ნატოში ინტეგრაციის პერსპექტივებზე, სამომავლო გეგმებსა და თანამშრომლობის გაღრმავებაზე ისაუბრეს. ლელა ჩიქოვანის განცხადებით, ტოტალური თავდაცვის კონცეფციიდან და პრინციპებიდან გამომდინარე, უწყებათშორისი თანამშრომლობა გენერალური მიმართულება და თავდაცვისუნარიანობის გაძლიერების ძირითადი კონცეფციური ხაზია.
შეხვედრა მრგვალი მაგიდის ფორმატში ჩატარდა და მას საქართველოს პარლამენტის, შინაგან საქმეთა სამინისტროს, შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის, საგანგებო სიტუაციების მართვის სააგენტოს, სახელმწიფო შესყიდვების სააგენტოს და ნატოს სამეკავშირეო ოფისის წარმომადგენლები დაესწრნენ.