სერჟანტთა სამეთაურო-საშტაბო კურსის დასრულების საზეიმო ცერემონია გაიმართა

თავდაცვის სამინისტროს „არმიჰოლში“ სერჟანტთა სამეთაურო-საშტაბო პირველი კურსის გამოშვების დასრულების ცერემონია გაიმართა. სამხედრო მოსამსახურეებს კურსის წარმატებით დასრულება საქართველოს თავდაცვის მინისტრმა, ლევან იზორიამ მიულოცა. სიტყვით გამოსვლისას მინისტრმა ყურადღება კურსის მნიშვნელობაზე გაამახვილა, სერჟანტებს კარიერული წინსვლა, მიზნების განხორციელება უსურვა და მხარდაჭერა აღუთქვა. ლევან იზორიამ საქართველოში სერჟანტთა კორპუსის განვითარების ეტაპები გაიხსენა და განაცხადა, რომ სერჟანტთა აკადემიის დაარსება და სამეთაურო-საშტაბო კურსის ჩამოყალიბება სერჟანტთა კორპუსის ინსტიტუციურ დახვეწას კიდევ ერთხელ ადასტურებს. თავდაცვის უწყების ხელმძღვანელმა კურსის ორგანიზატორებსა და საერთაშორისო პარტნიორებს მადლობა გადაუხადა.

პირად შემადგენლობას სიტყვით მიმართეს ასევე გენერალური შტაბის უფროსმა, გენერალ-მაიორმა ვლადიმერ ჩაჩიბაიამ და შეიარაღებული ძალების მთავარმა სერჟანტმა, მთავარმა სერჟანტმა კობა ცირეკიძემ.

კურსდამთავრებულები სერჟანტთა აკადემიის კაპელანმა, მამა გიორგიმ დალოცა.
ღონისძიებას გენერალური შტაბის წარმომადგენლები, ამერიკის ევროპული სარდლობის მთავარი სერჟანტი ქრის ედინქტონი, ნატოს მოკავშირეთა ოპერაციების სარდლობის მთავარი სერჟანტი დავორ პეტეკი, ამერიკის საზღვაო ქვეითთა ძალების ევროპაში მთავარი სერჟანტი, მაიკლ ვუდი და DEEP (Defense Education and Enhancement Program) პროგრამის მენეჯერი, მთავარი სერჟანტი ბრონიუს ბასილიკასი დაესწრნენ. სამეთაურო-საშტაბო კურსის გამოშვებაზე კურსდამთავრებულების ოჯახის წევრებიც იმყოფებოდნენ.
გიორგი ანწუხელიძის სახელობის სერჟანტთა აკადემიაში პირველი სამეთაურო-საშტაბო კურსი 29 სასწავლო კვირის განმავლობაში მიმდინარეობდა. კურსი, რომელიც სხვადასხვა ქვედანაყოფიდან 11 სამხედრო მოსამსახურემ გაიარა, 2018 წლის 26 მარტს დაიწყო და 12 ოქტომბერს დასრულდა. სერჟანტთა სამეთაურო საშტაბო კურსი სერჟანტთა სამხედრო პროფესიული განათლების კონცეფციის მე-3 დონის კურსს წარმოადგენს, რომელიც საქართველოს შეიარაღებულ ძალებში, სერჟანტთა განათლების სისტემაში ყველაზე მაღალი დონის კურსია და განკუთვნილია მასტერ სერჟანტთა და მთავარ სერჟანტთა შემადგენლობისთვის, რომლებიც დაინიშნებიან ან დანიშნულები არიან ბატალიონის, ბრიგადის სერჟანტის თანამდებობაზე, აგრეთვე სარდლობისა და გენერალური შტაბის სერჟანტთა შემადგენლობისთვის.

მსმენელებმა კურსის მიმდინარეობისას ომებისა და სამხედრო ხელოვნების ისტორიის, საერთაშორისო და ქვეყნის შიდა უსაფრთხოების, ლიდერობისა და მენეჯმენტის საკითხები შეისწავლეს. ისინი ბატალიონისა და ბრიგადის ოპერაციების დაგეგმარების პროცესს გაეცნენ და საბრძოლო მომზადების ორგანიზებისთვის საჭირო უნარები გაიღრმავეს.

სერჟანტთა სამეთაურო საშტაბო კურსის ჩატარების პროცესში აქტიურად იყვნენ ჩართულები დავით აღმაშენებლის სახელობის საქართველოს ეროვნული თავდაცვის აკადემიის სერჟანტთა სამეთაურო საშტაბო კოლეჯის ხელმძღვანელები და ინსტრუქტორები. ისინი სერჟანტთა აკადემიის ინსტრუქტორებს თავიანთ ცოდნასა და გამოცდილებას ინტენსიურად უზიარებდნენ.

კურსის დაწყებამდე, მომზადების პროცესში კი სამუშაო ვიზიტით მყოფმა ნატოს თავდაცვის განათლებისა და შენარჩუნების პროგრამის DEEP (Defense Education and Enhancement Program) წარმომადგენლებმა ქართულ მხარეს კურსის წარმატებით განხორციელებისთვის აუცილებელი რეკომენდაციები და რჩევები მისცეს, რაც კურსის პროგრამის შედგენისას გათვალისწინებული იქნა. ნატოს თავდაცვის განათლებისა და შენარჩუნების პროგრამის წარმომადგენლები საქართველოს სერჟანტთა კორპუსთან მჭიდროდ თანამშრომლობენ.