თავდაცვის კოდექსის პროექტი განხილვა დიპლომატიურ კორპუსთან
საქართველოს თავდაცვის სამინისტრო უკვე ერთი წელია თავდაცვის კოდექსის შემუშავებაზე მუშაობს. დღეს კოდექსის პროექტი საქართველოს თავდაცვის მინისტრის მოადგილემ ნუკრი გელაშვილმა ნატო-საქართველოს არსებითი პაკეტის (SNGP) ძირითადი ჯგუფის ექსპერტებთან და საქართველოში აკრედიტებული უცხო ქვეყნების დიპლომატიური კორპუსის წარმომადგენლებთან თავდაცვის ინსტიტუციური აღმშენებლობის სკოლაში (DIB) განიხილა.
შეხვედრაზე თავდაცვის მინისტრის მოადგილემ ახალი სამხედრო კოდექსის შემუშავების მნიშვნელობაზე გაამახვილა ყურადღება და განაცხადა, რომ კონსტიტუციაში შეტანილი ტერმინოლოგიური ცვლილებების, თავდაცვის ძალების გამოყენებისა და მოქმედების ახლებურად ჩამოყალიბებამ თავდაცვის კოდექსის შექმნის საჭიროება განაპირობა. ნუკრი გელაშვილმა ასევე აღნიშნა, რომ კანონმდებლობა, რომელიც თავდაცვის სფეროს არეგულირებს, ძირითადად 1990-იან წლებშია მიღებული და შესაბამისად, ადექვატურად ვერ ასახავს რეალობას, გარკვეული საკითხები კი, მოწესრიგებული იყო კანონქვემდებარე აქტებით.
კოდექსის პროექტთან დაკავშირებით თავდაცვის უწყების წარმომადგენლებმა კონსულტაციები უკვე გაიარეს კანონმდებლებთან. საგაზაფხულო სესიაზე პარლამენტში პროექტის უშუალო გატანამდე, ასევე იგეგმება კონსულტაციები და თავდაცვის კოდექსის პროექტის განხილვა საერთაშორისო პარტნიორებთან, სახელმწიფო უწყებებთან, კვლევით და არასამთავრობო ორგანიზაციებთან.