წყნეთში მომხდარ ინციდენტზე ახალი დეტალები გახდა ცნობილი. რესტორან „წისქვილში“ სამი ადამიანი ყოფილმა პატიმარმა დაჭრა. მათგან ორი სასჯელაღსრულების სამსახურის მაღალჩინოსანია, ერთი კი იუსტიციის მინისტრის ყოფილი მოადგილე. დაჭრილთა მდგომარეობა სტაბილურად მძიმეა. გავრცელებული ინფორმაციით, დანაშაულში ეჭვმიტანილი, რომელსაც ამ დრომდე ეძებენ, გიორგი ყანჩაველია. ის სამართალდამცველებმა 2016 წელს თბილისის ცენტრში მომხდარი სასტიკი მკვლელობის საქმეზე დააკავეს და სასჯელს დანაშაულის დაფარვისთვის იხდიდა, ვიდრე ოქტომბერში პრეზიდენტის მიერ შეწყალებულთა სიაში არ მოხვდა. გამოძიებამ რესტორანში მომხდარი დაპირისპირების ამსახველი ვიდეოკადრებიც მოიპოვა, რომელიც სათვალთვალო კამერითაა გადაღებული. შინაგან საქმეთა სამინისტრო საქმეს ჯანმრთელობის განზრახ მძიმე დაზიანების მუხლით იძიებს.