დღეიდან შიდა ტურიზმი იხსნება, რაც იმას ნიშნავს, რომ დღეიდან ადგილობრივი ტურისტი უკვე შეძლებს, ესტუმროს საქართველოში მდებარე იმ სასტუმროებს, რომლებმაც კოვიდ-19-ის გამო დაწესებული უსაფრთხოების კრიტერიუმები დააკმაყოფილეს. დღეიდან აღდგება შიდა რეგულარული ფრენებიც. მოგზაურებს კორონავირუსის პრევენციისთვის დადგენილი წესებით ხელმძღვანელობა მოუწევთ. სავალდებულოდ შესასრულებელ მოთხოვნათა ჩამონათვალშია დახურულ სივრცეში პირბადის გამოყენება და დისტანციის დაცვა. ტურისტებს პირბადით გადაადგილება და სოციალური დისტანციის დაცვა მოუწევთ ასევე სასტუმროების შიდა სივრცეებშიც და ა.შ. მართალია, 1 ივლისიდან უკვე საერთაშორისო ტურიზმიც იხსნება, მაგრამ ამ დრომდე ბუნდოვანი რჩება რომელი ქვეყნიდან შეიძლება საქართველომ უცხოელი ტურისტები მიიღოს. მიზეზი რა თქმა უნდა კორონავირუსის გამო შექმნილი არაპროგნოზირებადობაა. ამიტომ მთავრობაც ფსონს უფრო შიდა ტურიზმზე დებს. „ქართველებმა უნდა ვიმოგზაუროთ საქართველოში. იმდენი ადგილია, სირცხვილიც კია, რომ არ გვინახავს“, - თქვა პრემიერმა ერთ-ერთ შეხვედრაზე. რამდენად აიტაცებს მთავრობის მოწოდებას მოსახლეობა, ეს ალბათ შემდეგ თვეებში გამოჩნდება, იქამდე კი გავეცნოთ შიდა ტურიზმის პირველი კვარტლის სტატისტიკას.


#ახალიამბები #BusinessMediaGeorgia