„პანდემიის პერიოდში საქართველოს გამოცდილება: გამოწვევები, შესაძლებლობები, გზა მომავლისკენ“ - ამ თემებზე ისაუბრეს დღეს საქართველოს პრეზიდენტმა სალომე ზურაბიშვილმა, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა ეკატერინე ტიკარაძემ და საქართველოში აკრედიტებული დიპლომატიური კორპუსის წარმომადგენლებმა.
ჯანდაცვის მინისტრმა დამსწრე საზოგადოებას პანდემიასთან დაკავშირებული მოკლე ანგარიში წარუდგინა და დიპლომატიურ კორპუსს თანამშრომლობისთვის მადლობა გადაუხადა.
მინისტრმა აღნიშნა რომ პანდემიის პერიოდში საზოგადოებამ ნათლად დაინახა, თუ რამდენად მნიშვნელოვანია ჯანდაცვა და რა პრობლემები არსებობს სისტემაში.
„მოხდა გარკვეული გადაფასება იმისა, თუ რა არის მთავარი პრიორიტეტი ცხოვრებაში. ვფიქრობ, კოვიდის შემდეგ ჯანდაცვა გაცილებით უფრო მეტად აქცენტირებული სფერო იქნება, ვინაიდან უკვე ყველა ხარვეზი, რომელიც თითოეული ქვეყნის ჯანდაცვის სისტემაში არსებობს, მსოფლიოსთვის გახდა უფრო მეტად ხილული. კარგად გამოჩნდა ისიც, თუ რამდენად მნიშვნელოვანია მეცნიერება და მეცნიერების განვითარება“, - განაცხადა ეკატერინე ტიკარაძემ.
პანდემიის პერიოდში, საქართველოს გამოცდილების განხილვისას, განსაკუთრებული ყურადღება გამახვილდა, COVID 19-ის შედეგად დაწესებული შეზღუდვების დროს, საქართველოს პრეზიდენტის მიერ განხორციელებულ საერთაშორისო აქტივობებზე. ვირუსის პრევენციის მიზნით საქართველოს მიერ გატარებულ ღონისძიებებზე და ამ ზომებთან დაკავშირებით საერთაშორისო გამოხმაურებაზე. ამასთანავე, გლობალური კრიზისის პირობებში, საქართველოსა და საერთაშორისო პარტნიორებს შორის ურთიერთანამშრომლობის და ქვეყნისადმი დახმარების საკითხებზე.
დისკუსია ანალიტიკური ორგანიზაციის „ჯეოქეისი“ ინიციატივითა და ორგანიზებით გაიმართა.