The Eduard Shevardnadze Center
1997 წლის 16-22 ივლისს შედგა პრეზიდენტ ედუარდ შევარდნაძის ვიზიტი აშშ-ში.
„ეს ვიზიტი ამერიკის შეერთებულ შტატებში დიდად განსხვავდებოდა პირველისაგან, რომელიც 1994 წლის მარტში შედგა. მაშინ შევარდნაძე ვაშინგტონში ჩავიდა როგორც სასიცოცხლო ენერგიისაგან დაცლილი, გაპარტახებული, უპერსპექტივო სახელმწიფოს მეთაური, რომელიც პატივისცემას მხოლოდ მისი წარსულის გამო იმსახურებდა. მას არავითარი პოლიტიკური აქტივები არ გააჩნდა და მხოლოდ დახმარებას ითხოვდა იმისათვის, რომ თავისი ქვეყანა გადაერჩინა. დასავლეთი მას ენდო და მან ეს ნდობა გადაჭარბებით გაამართლა. ეს ნათლად აისახა ვიზიტის მთავარ პოლიტიკურ დოკუმენტში - ერთობლივ განცხადებაში ამერიკა-საქართველოს ურთიერთობათა შესახებ. აქ ნათქვამია: „პრეზიდენტმა კლინტონმა მაღალი შეფასება მისცა პრეზიდენტ შევარდნაძის ხელმძღვანელ როლს დემოკრატიისა და თავისუფალი ბაზრის პრინციპების დანერგვაში, რამაც საქართველო პოლიტიკური და ეკონომიკური რეფორმების მაგალითად აქცია ახალ დამოუკიდებელ სახელმწიფოთა შორის“. ოვალურ კაბინეტში შეხვედრისას კლინტონმა საქართველოს სწრაფ ტრანსფორმაციას „განსაცვიფრებელი“ უწოდა. აქვე ითქვა, რომ უნდა დაწყებულიყო განვითარების შემდგომი ეტაპი და აღინიშნა, რომ როცა სხვებისთვის მაგალითი ხდები და სიაში პირველ ნომრად ირიცხები, დიდი პასუხისმგებლობა გეკისრება, თუმცა, მეორე მხრივ, ფართოვდება შენი შესაძლებლობები, მიმზიდველ პარტნიორად იქცევი. შენს მიმართ ინტერესი იზრდება. ბოინგი, AT&T, შევრონი, დაჩშელი, ჯენერალ მოტორსი, ყველა თხოულობდა შევისთან შეხვედრას. სამი წლის წინათ ეს წარმოუდგენელი იქნებოდა. მიუხედავად კვლევითი ცენტრებიდან არაერთი მოთხოვნისა, პრეზიდენტი მხოლოდ ორში - საერთაშორისო კვლევათა ცენტრში და ეროვნულ დემოკრატიულ ინსტიტუტში გამოვიდა.
გაეროს ახალი გენერალური მდივანი, კოფი ანანი, აფხაზეთის კონფლიქტის მოგვარებით ძალიან დაინტერესებული ჩანდა. მან არ გამორიცხა მომავალში საერთაშორისო ძალების სამშვიდობო ოპერაციის ჩატარება, თუმცა, ისიც და სხვებიც ამ ძალაში რუსეთის სამხედრო კონტიგენტის ჩართვას აუცილებლად მიიჩნევდნენ. თუ ამ ვიზიტის დროს საუბრებში გამოთქმულ აზრებს განვაზოგადებთ, შეიძლება ასე ითქვას - მსოფლიო ორიენტირებულ