"პირადში ვერავის გწერთ, მეგობრებო, ვცდილობ დავძლიო ეს საშინელება" - ეს 28 წლის ხათუნა ქობალიას ბოლო მესიჯია სოციალურ ქსელში.

29 კვირის ორსული ქუთაისის კლინიკა ბომონდში სიცოცხლისთვის 11 დღის განმავლობაში იბრძოდა. უმძიმესი პნევმონიითა და სუნთქვის უკმარისობით ორსული ქალი კლინიკის რეანიმაციულ განყოფილებაში მკურნალობდა, თუმცა ექიმებმა მისი გადარჩენა ვერ შეძლეს. ვირუსს ემსხვერპლა ბავშვიც, რომელიც რამდენიმე კვირაში უნდა დაბადებულიყო.

ერთი პაციენტის სიცოცხლე ყოველ ნახევარ საათში - ასეთია ის ფასი, რომელსაც საქართველოს მოსახლეობა ახლა არასწორად მართული პანდემიის გამო იხდის.

საქართველომ დღეს ინფიცირებულთა მაჩვენებლით 100 ათას მოსახლეზე გადათვლით მსოფლიოში პირველ ადგილზე გადაინაცვლა, გარდაცვლილთა რაოდენობით კი მე-5 ადგილს იკავებს.

დედაქალაქის კლინიკების უმრავლესობაში თავისუფალი საწოლები აღარ არის. კოლაფსის ზღვარზეა რეგიონის კლინიკებიც. აჭარაში, დღეს კლინიკაში ტესტირებაზე მისულ მოქალაქეებს რამდენიმე საათი რიგში დგომა მაღალი ცხელებითაც უწევდათ. საუბრობენ იმაზეც რომ მათ ზარებს არც ოჯახის ექიმები და არც სასწრაფო დახმარების ცენტრი პასუხობს.

არასაკმარისია სამედიცინო აპარატურაც, რომელიც მართვით სუნთქვაზე მყოფი პაციენტებისთვის არის საჭირო. თუ უახლოეს დღეებში სიტუაციის სტაბილიზაცია არ შეინიშნა შესაძლოა ექიმები მძიმე არჩევანის წინაშე აღმოჩნდნენ, როდესაც ორ პაციენტს შორის ერთის გადარჩენა მოუწევთ. სპეციალისტები ამბობენ, რომ დელტა ვარიანტის პირობებში ახლა ვირუსს ახალგაზრდა ადამიანები ეწირება. სიტუაციას ართულებს ისიც რომ ქვეყანაში არ წარმოებს გარდაცვლილთა შემთხვევის შესწავლაც.

სულ უმწვავდება დაპირისპირება ჯანდაცვის მინისტრსა და მთავრობას შორის. დღეს ტიკარაძემ აღიარა რომ რეგულაციების შემოღება პანდემიის სამართავად მას აქამდეც სურდა, თუმცა ირაკლი ღარიბაშვილმა კატეგორიული წინააღმდეგობა გაუწია.

მმართველი გუნდის მსგავსად მთავარის კითხვებს გაურბის დღეს ქვეყნის მთავარ ინფექციონისტად წოდებული თენგიზ ცერცვაძეც.

​ინფექციური კლინიკის ხელმძღვანელმა მთავარს ბოიკოტი გამოუცხადა და მძიმე ეპიდვითარებაზე დასმულმა კითხვამ გააღიზიანა.

ავტორი: ზურა პეტროსიანი

#ახალიამბები #მთავარი #მთავარიარხი