ამ, შინაარსის ფეისბუქ კომენტარები, სოციალურ ქსელში გუშინ გავრცელდა. მშობლების ინფორმაციით, ბათუმის პირველ საჯარო სკოლაში მოსწავლეები არჩევანს, ორ უცხო ენას შორის ვეღარ გააკეთებენ და მსურველები, რუსულის ნაცვალდ, იტალიურს ვეღარ ისწავლიან. მოულოდნელმა სიახლემ, მოსწავლეებსა და მშობლებში პროტესტი გამოიწვია. ბათუმის პირველი საჯარო სკოლის დირექციაში, დღეს გაუგებრობაზე საუბრობენ. ირწმუნებიან, რომ ინფორმაცია არასწორად გავრცელდა და იტალიური ენის სწავლება ისევ გაგრძელდება. დირექტორის მოადგილე ამბობს, რომ მეშვიდე კლასის მოსწავლეებისთვის დამატებით პედაგოგი გახდა საჭირო და პრობლემა უკვე აღმოფხვრილია.თავიდანვე როგ გაუგებრობა იყო, ეჭვი არ ეპარება აჭარის უმაღლესი საბჭოს დეპუტატს - დავით ბაციკაძეს. განათლების კომიტეტის წევრი დარწმუნებით აცხადებს, მოსწავლეებს არჩევანის საშუალება ისევ ექნებათ.
ის, რომ გაურკვევლობა იყო და საგნის გაუქმებას არ აპირებდნენ, ეჭვი ეპარებათ „ერთიან ნაციონალურ მოძრაობაში“. ასმათ დიასამიძე ამბობს, რომ დირექტორმა გადაწყვეტილება ერთპიროვნულად მიიღო და პოსტ ფაქტუმ გაკეთებული განმარტებები მხოლოდ მიღებული პროტესტის შედეგია.
კამერებთან საუბარს მშობლები დღეს მოერიდნენ, თუმცა პირადრ საუბრებში დარწმუნებით აღნიშნავენ, რომ სკოლის ადმინისტარციამ იტალიური მხოლოდ იმიტომ დააბრუნა, რომ პროტესტის მასშტაბებმა შეაშინა.